"ბაიერნი" ეცდება ტერ შტეგენისა და "ბარსელონას" მოლაპარაკება ჩაშალოს

როგორც ჩანს, "ბაიერნის" მარკ-ანდრე ტერ შტეგენით დაინტერესება სერიოზულია.

ცოტა ხნის წინ გავრცელდა ინფორმაცია, რომ მიუნხენური გუნდი "ბარსელონასა" და მის მეკარეს შორის ახალ კონტრაქტზე მიმდინარე მოლაპარაკებებს თვალს ადევნებს. იმ შემთხვევაში, თუ "ბლაუგრანამ" და გერმანელმა მეკარემ შეთანხმებას ვერ მიაღწიეს, მიუნხენელები მზად არიან 27 წლის ფეხბურთელისთვის იბრძოლონ.

კატალონიური Sport-ის ცნობით, "ბაიერნი" აპირებს "ბარსელონასა" და ტერ შტეგენს შორის მიმდინარე მოლაპარაკებებში ჩაერიოს. მიუნხენელები შეეცდებიან გერმანელი მეკარე დაარწმუნონ, რომ მან "ბლაუგრანასთან" კონტრაქტის გახანგრძლივებაზე უარი თქვას.

თუ "რეკორდმაისტერმა" მიზანს მიაღწია, მაშინ ტერ შტეგენი გუნდს 2021 წელს შეუერთდება და ჩაანაცვლებს მანუელ ნოიერს, რომელსაც კლუბთან კონტრაქტი სწორედ ამ წელს უმთავრდება.

ტერ შტეგენს "ბარსელონასთან" კონრაქტი 2022 წლამდე აკავშირებს. მხარეები მოლაპარაკებებს აწარმოებენ, მაგრამ ფეხბურთელი იმაზე 2-ჯერ მეტს ითხოვს, ვიდრე მას კლუბი სთავაზობს.