მატჩისშემდგომი მიმოხილვა: დიაგნოზი - ტაქიკარდია

ლა ლიგაში, ზედიზედ  ოთხი თამაში მოუგებლად. ოთხიდან ორი მარცხი. ზედმეტი მიდებ-მოდების გარეშე - კატასტროფული შედეგია. ჩემპიონთა ლიგა გამოგვიკეთებს ხოლმე განწყობას და მერე ისევ შარში ვართ. ამაზე ვან გაალის "ბარსელონა" გამახსენდა, ოღონდ მეორე ფორმაციის. მაშინაც ასეთი სურათი იყო, ჩემპიონთა ლიგაზე იდეალურად თამაშობდა და ლა ლიგაში ქულას ქულაზე კარგავდა. როგორც კი "ბარსა" ლიგის მეოთხედფინალიდან გავარდა, ლუი დაითოვეს, ხოლო "ბარსამ" ჩემპიონატი მეექვსე ადგილზე დაასრულა, ის მეექვსე ადგილიც ბოლო ტურში მოიპოვა, თორემ საერთოდ ევროტურნირის გარეშე რჩებოდა.

ახლაც ჰოლანდიური ამბავი გვაქვს და იმედია, ასე კოშმარულად არ წარიმართება, მით უმეტეს, რომ შემადგენლობა გაცილებით ძლიერია, ვიდრე მაშინ იყო.

გრიზმანი

არის! აღსრულდა! გრიზმანმა მშრალი სერია შეწყვიტა, მეკარეს თავზე გადაუგდო და ანგარიში გაათანაბრა. ასეთი დარტყმით წინა სეზონშიც შეაგდო რამდენიმე გოლი, საერთოდ, თუ რომელიმე კომპონენტზე ვიტყვით, რომ იგივე დონეზე აქვს, სწორედ ასეთი დარტყმაა, უპრობლემოდ შეუძლია მეკარეს თავზე გადაუგდოს, თუმცა, სხვა არაფერი გამოსდის.

თავს არ მოვიტყუებ და არ ვიტყვი, რომ ამ გოლის მერე გრიზმანი აიწყვეტს და საუკეთესო ბომბარდირი გახდება. არა, ეს ერთი ჩვეულებრივი გოლია, რომელსაც მაქსიმუმ ის შეუძლია, რომ ანტუანი დეპრესიიდან გამოიყვანოს.

ანგარიში კი მას შემდეგ გავათანაბრეთ, რაც მეტოქე კაცნაკლული დარჩა. უკვე ასე გვაქვს საქმე. ბოლო წუთებზე "ბარსამ" შტურმი მოაწყო მეტოქის კართან, მაგრამ გოლი აღარ გასულა. მთელი თამაში როგორც უნდა ეთამაშათ, ისე ითამაშეს ბოლო 10 წუთი.

მესი

თერთმეტმეტრიანები რომ არ მივიღოთ მხედველობაში, მესის მშრალი სერია ისევ გრძელდება. გრიზმანზე კარგად არც მას აქვს საქმე. რა თქმა უნდა, იმის გათვალისწინებით თუ ვისზე ვსაუბრობთ. თავის დონეს მოწყვეტილია, ეს განსაკუთრებით დამაგვირგვინებელ ფაზაზე ითქმის. ბოლო პასის მხრივაც პრობლემებია. თითქოს მოტივაცია აკლია, "იუვენტუსთან" კარგი იყო, მიუხედავად იმისა, რომ თამაშიდან იქაც ვერ შეაგდო. დარწმუნებული ვარ, "კამპ ნოუზეც" გაიბრწყინებს, მით უმეტეს, თუ რონალდუც გვესტუმრება. აი დანარჩენ გუნდებთან მოტივირება ძალიან უჭირს. აღარც ბომბარდირობაზე მოდის გული, თითქოს თამაში აღარ უხარია.

დემბელე და ფატი

დემბელეს წინა შეხვედრაში გაეღვიძა. ახლა ისევ ჩაყვინთა. რა გასაკვირია?! ეს ხომ დემბელეა?! მისგან ყველაფერია მოსალოდნელი, ცუდიც და კარგიც.

ჩვენი ოქრო 18 წლის შესრულდა, უკვე შეუძლია ლუდიც მოწრუპოს. შეტევაში საუკეთესო იყო. თუ შექმნილ მომენტებს დავითვლით. მართალია ერთი 100%-ანი შანსი ქარს გაატანა, მაგრამ საერთო ჯამში ყველაზე აქტიური იყო. აღსანიშნავია თუ როგორ გრძნობს "ოფსაიდის" ხაზს, ყველა მომენტი, რომელიც შექმნა, მცველთან ზუსტად ერთ ხაზზე იყო. გარდა გაფუჭებული მომენტისა, ერთხელ გრიზმანს დაუგორა ძალიან კარგად, მაგრამ ფრანგმა ააცილა, მეორედ მესის გაუგორა, მაგრამ მეკარემ შეძლო აღება. მესამედ კი მგონი ისევ მესის გაუგორა, მაგრამ პასი გრიზმანმა ჩაჭრა. ეს კიდევ ერთი დასტურია იმისა, რომ აბსოლუტური სიგიჟეა ორი ისეთი ფეხბურთელი გყავდეს გუნდში, რომელიც ერთი და იმავე სივრცეში მოქმედებს.

ნახევარდაცვა

დე იონგი თვალსა და ხელს შუა ცენტრალურ მცველად ყალიბდება. რონალდ კუმანი მასში ალესანდო ნესტას ხედავს! ხუმრობა იქით იყოს, სეზონის წინაც ჩანდა, რომ ცენტრალური მცველი აუცილებლად გვჭირდებოდა, თავად კუმანმაც წაიწუწუნა ამაზე, მაგრამ კლუბი გაკოტრების ზღვარზეა და ტრანსფერი ვერ შედგა. უპამეკანო ახსენეს დასაწყისში, პანდემიის მერე კი, მისი ყიდვა გამოირიცხა.

ასე მივიღეთ დაცვაში ფრენკი. ვერაფერს იტყვი, ბურთი მშვენივრად ამოაქვს.

საუკეთესოები შეცვლაზე გამოვიდნენ. პიანიჩი და პედრი. საერთოდ, პედრის სკამზე დასმა ვერ იყო გონივრული, გასაგებია, რომ 17 წლის არის და დასვენებაც სჭირდება, მაგრამ როცა ასეთი კარგი პერიოდი აქვს, უმჯობესია, რომ მაქსიმალური დრო დაუთმო.

პიანჩმა კიდე ის გააკეთა, რაც წლებია "ბარსას" ნახევარმცველისგან აღარ მინახავს. შორიდან გაისროლა, თანაც ზუსტად! ბოლოს რაკიტიჩიც კი აღარ კადრულობდა ამას, ბუსკეტსი და დე იონგი რომ კარში დამრტყმელები არ არიან, ვიცით, აი კოუტინიო კი ცდილობდა წინა ტურებში, მაგრამ შორიდან ვეღარ ურტყამს ისე, როგორც ადრე. ჰოდა, გაისროლა პიანიჩმა. დიდი არაფერი, ერთი დარტყმა რა სათქმელია, მაგრამ ეს ის კომპონენტია, რომელიც შეტევის მრავალფეროვნებისათვის აუცილებელია.

სხვაც არაფერი დაეწუნებოდა. მე მგონი, რომ ყალიბდება ძირითადის წევრად.

დაცვა

და აი, მივედით მთავარ შეცდომამდეც. ფაქტია, ორივე დამნაშავეა, თუმცა ჩემი გადმოსახედიდან ნეტუ უფრო შეცდა. რატომ დაიძრა პიკესკენ და რატომ შეამცირა მანძილი აბსოლუტურად გაუგებარია. როცა მეტოქე პრესინგს თამაშობს, პირიქით, ფეხბურთელებმა ერთმანეთს შორის მანძილი უნდა გაზარდონ, რომ ბურთის ჩაჭრის საფრთხე არ შეიქმნას, ნეტუ კიდე პირდაპირ პიკეზე დაიძრა. მერე ტერ შტეგენივით ფინტებიც ვერ გააკეთა და გაგვიტანეს.

რაში შეცდა პიკე? შეცდა იმაში, რომ პასი ზეპირად გააკეთა, უკვე გადაწყვეტილი ჰქონდა, რომ მეკარისთვის დაებრუნებინა და საერთოდ არ შეაფასა სიტუაცია, თორემ ერთ მეტრიან პასს როგორ გააკეთებდა?!

ასე იყო ეს ამბავი. კურიოზული გოლი მივიღეთ, რაღაც აბდა-უბდა და მოგონილი გოლი. სამწუხაროა, მაგრამ ყველაზე მეტად, სწორედ ეს მომენტი ასახავს "ბარსას" მდგომარეობას.

კუმანი

კუმანის ხელში "ბარსას" ტაქიკარდია აქვს. ხან მოუმატებს, ხან მოუკლებს, ისე სწრაფად და ლოგიკის გარეშე უკლებს და უმატებს, რომ ხან გაჩერებასთან არის ახლოს, ხან ინფარქტთან, ჰოდა დროა საჭირო ტემპი იპოვოს, თორემ გასკდა გული.

სტაბილურობის ნაკლებობა შეგვიძლია იმასაც დავაბრალოთ, რომ საჭირო თერთმეტეული ვერ იპოვა. მეტნაკლებად დაცვაზე შეიძლება ითქვას, რომ ჩამოყალიბებულია, აი დანარჩენ პოზიციებზე ვერ ვიტყვით, რომ ვინმეს 100%-ით ენდობა. მესიზეც კი ვერ ვიტყვით ამას, უბრალოდ მესის ვერ ეხება, იმიტომ, რომ მესია.

ეს არის კუმანის უპირველესი ამოცანა. რაც შეიძლება სწრაფად უნდა ჩამოყალიბდეს ძირითად თერთმეტეულზე. მერე რაღაც გამოვა და იქნებ ვიბრძლოთ კიდეც ჩემპიონობისთვის.