მატჩისშემდგომი მიმოხილვა: დაბრუნდა!

ბერლინის კედელი ტერ შტეგენთან შედარებით ჭიჭვეიშვილის ღობე ყოფილა. მომავალი კაპიტანი დაბრუნდა და ბარსელონურ კარიერაში ერთ-ერთი საუკეთესო პერფორმანსი დადო.

დაბრუნებაც ასეთი უნდა!

გრიზმანს რომ მისი მენტალობის ნახევარი მაინც ჰქონდეს.. თუმცა, რა დროს გრიზმანია?! რთული წარმოსადგენი იყო, მაგრამ ყველაზე დიდი სანახაობა შტეგენმა შემოგვთავაზა, მაშინ როცა მესი და დანარჩენები მოედანზე იყვნენ.

კუმანის ექსპერიმენტების გამო და არა მხოლოდ ამ მიზეზით, "ბარსას" კართან უამრავი მომენტი შეიქმნა და სწორედ ამის ხარჯზე ვიხილეთ გერმანელის შოუ. ერთადერთი რაც ამ ყველაფერს აკლდა, "კამპ ნოუს" ყიჟინა და აპლოდისმენტები იყო, დაახლოებით ისე აყვირდებოდნენ, როგორც "სევილიასთან" ნაჩვენები სასწაული თამაშის შემდეგ ყვიროდნენ.

მხოლოდ სათადარიგოების ოვაციები ისმოდა. გაიძარცვა ფეხბურთი, გულშემატკივრის გარეშე.  

შტეგენმა ჩვეული სიმშვიდით და დამაჯერებლობით ჩაატარა მთელი თამაში. რომ არა გერმანელი, საუკეთესო ფეხბურთელი ალბათ მეტოქის მეკარე იქნებოდა, რომელმაც ასევე საოცარი ბურთები მოიგერია, მაგრამ შტეგენის სპექტაკლის მერე მაინც ჩვეულებრივ მეკარედ დარჩა.

ექსპერიმენტული დაცვა

წინაზე ვიხუმრე, კუმანი დე იონგში ალესანდრო ნესტას ხედავს-მეთქი და დავრჩი გაღიმებული. თურმე მართლა ხედავს. არა მგონია, ეს ბოლო შეხვედრა ყოფილიყო, როცა ფრენკი ცენტრალურ მცველად ვიხილეთ. ეს გადაწყვეტილება ბოლომდე შემტევი ტაქტიკით იყო გამოწვეული, როცა "ბარსა" მეტოქის ნახევარზე მკვიდრდებოდა, დე იონგი დამატებითი ფუნქციით იტვირთებოდა, სიღრმიდან, რაც შეიძლება სწრაფად უნდა შეეცვალა შეტევის მიმართულება. კარგადაც გაართვა თავი, დაცვიდან რომ ბურთის ამოტანის პრობლემა არ ექნებოდა, ესეც ნათელი იყო, მაგრამ საერთო ჯამში, როგორც მან, ისე მთელმა დაცვის ხაზმა საშინლად ითამაშა.

ფლანგებიდან, ცენტრიდან, საიდანაც სურდათ, იქიდან გვიტევდნენ და მათი შემჩერებელი არავინ იყო. დაცვაში ძალიან სუსტი იყო სერჟინიო დესტი, პოზიციურად ცუდად ითამაშა, რამდენჯერმე სისწრაფეშიც დაიჩაგრა და სახიფათო ჯარიმის აღება მოუწია.

ამ გადმოსახედიდან, უმტიტისაც აუცილებლად მიეცემა შანსი.

ნახევარდაცვა

არ ყოფილა კარგი შეხვედრა ნახევარცველებისთვის. ასეთ მეტოქესთან მეტი იყო საჭირო. პიანიჩმა ძირითადში დაიწყო და პოზიციიდან გამომდინარე ზედმეტად ბევრი პასი გაუცუდდა. ეს არ ყოფილა "ბოლო პასი", რომ განსაკუთრებულ სირთულესთან გვქონოდა საქმე, რიგ შემთხვევებში ძალიან მარტივ სიტუაციაში ცდებოდა.

პედრიმ ორი კარგი მომენტი შექმნა, დესტის ჭკვიანური პასის შემდეგ, თუმცა, გოლი ვერ შეაგდო. გარდა ამ მომენტებისა, განსაკუთრებული არაფერი შეუქმნია. მალე კოუტინიო დაბრუნდება და ყველა ასეთი მომენტის გამოყენება მოუწევს, იმისათვის, რომ მეტი სათამაშო დრო მიიღოს.

თავდასხმა

გრიზმანით დავიწყოთ. თამაშამდე დავწერე, რომ ეს მისი შანსი იყო, თუ ზედიზედ ორ თამაშში გაიტანდა გოლს, ფსიქოლოგიურად და მენტალურად ერთი ნაბიჯი წინ გადაიდგმებოდა, კალენდარის გათვალისწინებით გრიზმანს შეეძლო ძალიან კარგი სერია შემოეთავაზებინა, მაგრამ ამის ნაცვლად კიდევ ერთი დარტყმა მოგვაყენა. ორი მეტრიდან ააცილა. კაი, სამი მეტრიდან.

ეს შანსიც ქარს გაატანა. ალბათ, მალე მასაც ქარი წაიღებს. Le Vent Nous Portera, Antuan!

ეს დავიდარაბა, რასაც მარჯვენა გარემარბის ძიება ჰქვია, სეზონის ბოლომდე გაგრძელდება. კანდიდატები მრავლად გვყავს, ჰოდა იბრძოლონ ძირითადისთვის. აი მარცხენა ფლანგი დაივიწყონ!

არ ვიცი, შეიძლება მეჩვენება, მაგრამ ანსუ ფატი ძალიან სწრაფად პროგრესირებს. ისეთი აზროვნების უნარი დაჰყვა, რომ მისთვის ყველაფერი მარტივია, გოლი არ შეუგდია, სამაგიეროდ საგოლე პასი მიითვალა და ჩემი აზრით საუკეთესო იყო მოედანზე (გერმანელ კედელს თუ არ ჩავთვლით).

გოლებიც იქნება, აუცილებლად! ისე თამაშობს, რომ სხვანაირად შეუძლებელია.

მესის თერთმეტმეტრიანების სერია კი გრძელდება. ისევ გაიტანა ნიშნულიდან და ისევ ვერ გაიტანა თამაშიდან. ჯარიმაც ვერ გაიტანა, თუმცა ამაში მთავარი დამნაშავე მეტოქის მეკარეა, ზუსტად ცხრიანიდან გამოაძრო ბურთი. ლეოს ჰქონდა კიდევ ერთი-ორი მომენტი, მაგრამ მეკარე სჯობნიდა. ამხელა მშრალ სერიასაც არ ველოდი. გასაგები იყო, რომ მძიმედ დაიწყებდა, მაგრამ მესისთვის ეს მეტისმეტია.

კრიზისი

90-ანების ბოლოს კიევის "დინამომ" გადაგვირბინა, სახლშიც და გასვლაზეც. შევჩენკო-რებროვის დუეტმა შუაზე გაგვგლიჯა. კიევის მატჩი იმითაც დამამახსოვრდა, რომ რივალდომ ნახევარი მეტრიდან კარს გადააცილა, მიმიქარავს გრიზმანი, ისეთი გააკეთა! ძალიან გაუმართლა, რომ იმ დროს სოციალური ქსელები არ იყო, თორემ ეს სირცხვილი კარიერას დაუმახინჯებდა.

"დინამოს" ლობანოვსკი წვრთნიდა და ნახევარფინალამდე იფრინეს. ამ ფორმაციის "დინამო" კი მგონი საშუალო დონის გუნდიც არ არის, მიუხედავად ამისა "ბარსას" "კამპ ნოუზე" ტოლსწორად ეთამაშა. თანაბრად თუ არა, არც არაფერი დაუკლიათ. არ მინდა ამის თქმა, მაგრამ გუნდში კრიზისია. როგორც ეკონომიკურად, ისე საფეხბურთო თვალსაზრისით. ამას ემატება ქაოსი, რომელსაც დირექტორთა საბჭო იწვევს თავის გადაწყვეტილებებით, "ბარსა" ახლა თავმოგლეჯილ ცხოველს ჰგავს, რომელიც სიკვდილამდე კიდევ ახერხებს აქეთ-იქით სირბილს.

სანამ ახალი თავი, ანუ ახალი პრეზიდენტი მოვა, მანამდე ალბათ კიდევ ბევრი გაუგებრობა იქნება მოსალოდნელი. იმედია არ გავკოტრდებით და ქულებს როგორმე დავაგროვებთ ისე, რომ ჩემპიონობის შანსი ზამთარშივე არ დავკარგოთ.

ასეთი ამბავია. ორ დღეში "ბეტისს" მივიღებთ.