მეტოქე ფოკუსში: კილიან მბაპე

პოჩეტინოს მცირე დრო ჰქონდა, მაგრამ მნიშვნელოვანი ცვლილებები მაინც მოასწრო. რეალურად, ტუხელი გაუშვეს იმიტომ, რომ მასში ეჭვი შეეპარათ, ხელმძღვანელობამ ვერ დაიჯერა, რომ "ბარსას" დამარცხება შეეძლო, პოჩეტინო არის კაცი, რომლის უპირველესი ამოცანა კატალონელების დამარცხებაა, სწორედ ამისთვის მიიყვანეს გუნდში.

პირველი, რაც შეცვალა, რა თქმა უნდა, ტაქტიკა იყო. ტუხელი სამმცველიანი ტაქტიკით თამაშობს, რომელიც დაცვის დროს ხუთ მცველზე ეწყობა, პოჩეტინოს კი კლასიკური 4 მცველი ურჩევნია და უნდა ითქვას, რომ პსჟ-ს ეს ტაქტიკა უფრო შეეფერება.

თამაშის წინ, პრობლემები არ აკლია, ისევე როგორც "ბარსას". დი მარია და ნეიმარი გამოაკლდა. ფორმაში შევიდა იკარდი, მაგრამ მისი იმედი დიდად ვერ ექნება ადამიანს. აი კილიან მბაპე მთავარი დამრტყმელი ძალა იქნება, დიდი ალბათობით პარიზში ბოლო სეზონს ატარებს და საოცნებო ტიტულისთვის ემზადება.

ანრისა და ეტო’ოს სინთეზი

ჯერ არც ერთის და არც მეორე ფეხბურთელის დონემდე არ მიუღწევია, ამისათვის სტაბილურად მაღალ დონეზე თამაშია საჭირო, იმ შედეგების გამეორება და გაუმჯობესება, რაც ყოფილმა "ბარსელონელებმა" აჩვენეს, მაგრამ კილიანს აქვს ის, რაც ანრისაც ახასიათებდა და ეტო’ოსაც.

პირველ რიგში მის ფიზიკურ მონაცემებს უნდა გავუსვა ხაზი. სისწრაფეს სძენს არა მხოლოდ სიხშირე, არამედ დიდი ნაბიჯი. ტიერი ანრის რატომ ჰქონდა დიდი ნაბიჯი გასაგებია, მისი სიმაღლე 1.88 სანტიმეტრია, მაგრამ 1.78 სიმაღლის კილიან მბაპეს ამხელა ნაბიჯი მართლა გაკვირვებას იწვევს. ეს არის ის, რასაც ვერც ისწავლი და ვერც ვარჯიშით შეიძენ, უბრალოდ ასეთია ფიზიოლოგიურად, საშუალო სიმაღლე და გრძელი ფეხები აქვს.

ამასთან ერთად, გამოირჩევა იმით, რითიც გამოირჩეოდა სამუელ ეტო’ო, არანორმალური სასტარტო სისწრაფე აქვს, გულშემატკივარს ახსოვს, როგორ ჩაგრავდა კამერუნელი ნებისმიერ მცველს, უმოკლეს მონაკვეთში, ჯერ კიდევ "მალიორკაში" ყოფნის დროს რობერტო კარლოსს სისხლი გაუშრო, გრძელ დისტანციაზე მასთან ვერაფერს გააწყობდა, მაგრამ სასტარტო სისწრაფეში, 3-4 მეტრის რადიუსში უმარტივესად ჩაგრავდა.

საბოლოო ჯამში გამოდის, რომ მბაპე, როგორც გრძელ დისტანციაზე, ისე მოკლე დისტანციაზე ერთ-ერთი ყველაზე სწრაფი ფეხბურთელია, ვისაც ოდესმე ფეხბურთი უთამაშია. ამას დავუმატოთ მისი ტექნიკური მონაცემები და მივიღებთ შეუჩერებელ ფორვარდს.

მისი შეჩერება მხოლოდ კოლექტიური დაცვით არის შესაძლებელი, ესეც იმ შემთხვევაში თუ სივრცეს შეუზღუდავ.

პოჩეტინოს ხელმძღვანელობის პერიოდში

ანალიზისთვის ბოლო თამაშები გამოვყავი, ის შეხვედრები, რომელიც პოჩეტინოს ხელმძღვანელობით ჩაატარა. "მარსელთან" განხორციელებულმა სპრინტმა საფეხბურთო სამყარო აალაპარაკა, მთელი მოედანი 11 წამში გაირბინა, ეს მაშინ, როცა მაქსიმალური სისწრაფე მხოლოდ დასკვნით ფაზაში აკრიფა.

ვიდეოში ჩანს, რომ უმარტივესად პოულობს მცველებს შორის სივრცეს და თუნდაც 1-დან 5-მეტრამდე ჩამორჩენა ჰქონდეს, მათ დაჩაგვრას მაინც ახერხებს. იმ შემთხვევაში თუ მცველების ხაზზე გასწორდა, მისი შეჩერების არანაირი შანსი არ არსებობს.

დასკვნით ვიდეოში ჩანს, რომ მოედნის ცენტრში გაკეთებული პასის მერე, ყოველთვის აგრძელებს შეტევას, რაც ერთ ვინმეს გაგვახსენებს, დღესდღეობით ამ კუთხით საუკეთესო ლიონელ მესია, შეუძლია ცენტრიდან გადაიტანოს ბურთი ალბაზე და უსწრაფესად აღმოჩნდეს საჯარიმოში. აქ ხაზი უნდა გავუსვათ არა სისწრაფეს, არამედ თამაშის წაკითხვის უნარს, მბაპეც მოაზროვნე ბიჭია, სხვა სიკეთეებთან ერთად.

ბოლო მომენტში კი მცველს ისე ცდება, როგორც სავარჯიშო დგარს, გინდ იდგეს, გინდ არა.

დასკვნა

"ბარსას" დაცვაში ასეთი პრობლემები ვან გაალის შემდეგ არ ჰქონია. ვაი რომ სწორედ ამ დროს უნდა დავუპირისპირდეთ ახალგაზრდა და ჯან-ღონით სავსე ვარსკვლავს. კარგი ის არის, რომ ნეიმარისა და დი მარიას (სავარაუდოდ) გარეშე, საუკეთესო პასის მიმცემები არ ეყოლება, მაგრამ ესეც კი ვერ გაათანაბრებს შანსებს მასსა და ჩვენს მცველებს შორის.

როდესაც ჩემპიონთა ლიგის ფინალში "არსენალს" დავუპირისპირდით, თამაშის წინ თქვეს, რომ ანრისთან "ბარსას" მცველებს შანსი არ ჰქონდათ. მიუხედავად იმისა, რომ პუიოლი და მარკესი მშვენიერ ფორმაში იმყოფებოდნენ, აღნიშნეს, რომ თუ "ბარსას" რამე გადაარჩენდა, თავად ანრის უზუსტობა იქნებაო და ასეც მოხდა, ტიერიმ თავისივე შექმნილი შანსები ვერ გამოიყენა. სამივეჯერ ვალდესმა გვიხსნა.

ასეა ამჯერადაც, ორი შანსი გვაქვს, რომ ქარიშხალს გადავურჩეთ, ან თავად კილიანმა უნდა გააფუჭოს მომენტები, ან ტერ შტეგენმა უნდა გვიხსნას, თორემ დაცვა რომ მასთან ვერაფერს გააწყობს, ეს ფაქტია.