მატჩისშემდგომი მიმოხილვა: "ბარსა" ევროპა ლიგაზე
მოხდა ის, რაც უნდა მომხდარიყო. "ბაიერნმა" მარტივად მოიგო, "ბარსას" არაფერი გამოუვიდა. სურპრიზები არ ყოფილა. როცა უსმან დემბელე შენი მთავარი იმედია, ამით ყველაფერი ნათქვამია, ესე იგი, გუნდი აღარ გყავს და რაღაც ახლის შექმნას აპირებ, უბრალოდ, ვერ ვიტყვით, რომ შენების პროცესი კარგად მიმდინარეობს, უფრო მეტიც, შეიძლება ითქვას, რომ ზრდის პროცესი საერთოდ არ ჩანს.
როგორც გუნდური, ისე ინდივიდუალური თვალსაზრისით "ბაიერნი" იყო გაცილებით სწრაფი, დაცვით თუ შეტევით ფაზაში, საერთოდ, კარგია მთავარ ფავორიტთან შეხვედრა, რადგან, რეალურად ამ დროს ხედავ განსხვავებას, რამდენი გვაკლია ძველ დონეზე დასაბრუნებლად, ჰოდა, გამოჩნდა, რომ ძალიან ბევრი გვაკლია. "ბენფიკასთან" მიღებული შანსი უნდა გამოგვეყენებინა, დარწმუნებული ვარ ფინანსური თვალსაზრისით ჩემპიონთა ლიგის მერვედფინალი ერჩივნა ლაპორტას, ევროპა ლიგის ფინალს. არ გამოვიდა, ასე მოხდა. პირველად 17 წლის შემდეგ ხუთშაბათს "ბარსასთვის" დამატებითი მნიშვნელობა მიენიჭება და ეს მაინც და მაინც კარგი ვერ არის, რადგან ხუთშაბათი მოუხელთებელი დროა, შაბათ-კვირისთვის გაცილებით ნაკლები დრო გრჩება დასასვენებლად, თან, ფეხბურთელებიც მიუჩვეველნი არიან ამ დროს თამაშს.
ნებისმიერ შემთხვევაში, ახალი მოგზაურობა საინტერესო იქნება, ოღონდ, უნდა ვიცოდეთ, რომ "ბარსა" არაფრის ფავორიტი არ არის.
აი ასე, დასრულდა ძალიან დიდი ხნის წინ დაწყებული ვარდნა. დასრულდა ორი გატანილი გოლით ჩემპიონთა ლიგაზე. იყო დრო, როცა ორ გოლს B გუნდის ფეხბურთელები იტანდნენ ბოლო არაფრის მომცემ ტურში, ახლა კი ჩვენმა მრისხანე შეტევამ მეტი ვერ გაახერხა. ძალიან ბევრჯერ დაგვიწერია, რომ მესის ძალა რეალურად მხოლოდ მაშინ გამოჩნდება, როცა ბრძოლის ველზე აღარ იქნებოდა, და აი, დასტურიც. თურმე რამხელა ტვირთი ჰქონია მხრებზე, თურმე რას დაათრევდა?!
ერთი ძალიან ცუდი ამბავი მენიშნა, მე მგონი, რომ ფრენკი დე იონგს "ბარსაში" თამაში აღარ სურს. საფეხბურთო გრანდში მოვიდა სულ სხვა მიზნებით და ახლა "აიაქსიც" კი უკეთესი გუნდია, ვიდრე "ბარსა". არა მგონია დიდხანს გაჩერდეს. ალბათ ზაფხულშივე აიბარგება და ჩავი ბოლომდე "ლა მასიელებზე" გააკეთებს აქცენტს. კლუბსაც ასახელებენ, თურმე, პეპ გვარდიოლას სურს ფრენკის წაყვანა. ყველა დალაგებულ გუნდში ძალიან მაღალი დონის ფეხბურთს ითამაშებს, მაგრამ, როცა გუნდი დაულაგებელია, ფრენკი დე იონგი არ არის ის ფეხბურთელი, ლიდერობა აიღოს ხელში და გუნდს წინ გაუძღვეს. არ არის და არც არასდროს ყოფილა. ეს მისთვის ახალი და უცხო მოცემულობაა, რაშიც თავს დიდად კომფორტულად ვერ გრძნობს.
წასვლის შანსი იზრდება მეორე ვარსკვლავის შემთხვევაშიც. ტერ შტეგენი თავის თავს აღარ ჰყავს. სადებიუტო სეზონის დონეზე თამაშობს. ეს მისთვის ალბათ ყველაზე ცუდი სეზონია, თითქოს ისიც გატყდა, წარმოუდგენლად ჩანდა, მაგრამ ეგეთი შთაბეჭდილება მრჩება, დაიღალა და აღარ უნდა წარუმატებელ გუნდში ყოფნა, მაშინ, როცა საუკეთესოობას ცდილობდა. კიდევ ერთხელ დააჭირა წიხლი მანუელ ნოიერმა, კიდევ ერთხელ ჩაუმტვრია ნეკნები და აჩვენა, რომ პირველობის სურვილი უბრალოდ უნდა დაივიწყოს. იყო შანსი სეზონის დასაწყისში, რომ "ბარსას" შტეგენი გაეყიდა და დონარუმა უფასოდ დაემატებინა, მაგრამ ვერ შედგა ეს ამბავი, ერთ ფართე კაცს ბევრი ფული უნდოდა და დააწვნენ პარიზში, ჰოდა, ვერც "ბარსას" წაადგა ეს ამბავი და ვერც დონარუმას.
ალბათ გაიფიქრებდით ლეროი სანეზეც, მას შემდეგ, რაც გვარდიოლამ მოიძულა "ბარსას" ასახელებდნენ მსურველებში, თითქოს დემბელეს შემცვლელად, იქნებ მას მაინც გაემართლებინა მესისთან და სუარესთან ერთად. მაგრამ, თუნდაც გადმოსულიყო, ალბათ არაფერი გამოვიდოდა, "ბაიერნმა" რეგრესის გზაზე მყოფი სანე ჩაიბარა და სწორ გზაზე დააყენა, "ბარსას" კი დიდი ხანია ამის უნარი აღარ აქვს, ალბათ, განაგრძობდა დაცემას და ჩვენც იმედი გაგვიცრუვდებოდა. უჰ, ძალიან ბევრი რამეა შესაცვლელი, ძალიან ბევრი რამეა მოსარევი.
ტრანსფერები აუცილებელია, მაგრამ რა უნდა გააკეთო, როცა ფულიც არ გაქვს, გაშვებული მწვრთნელები მილიონებს ითხოვენ, ჩემპიონთა ლიგაზე ფულის აღების შანსს კარგავ და გადადიხარ ტურნირზე, რომელსაც გაცილებით ნაკლები მაყურებელი ჰყავს, შესაბამისად, ყოველ მატჩში გაცილებით ნაკლებს მიიღებ და სპონსორებთანაც აგერევა საქმე. ახლა მთავარი კითხვა შემდეგია, - ნუთუ, ისურვებს ჰალანდის დონის ფეხბურთელი ამ კლუბში გადმოსვლას? როგორი ლამაზი პროექტიც არ უნდა დაუდო? რაღაც არა მგონია. რო შეხედავ არ ჰგავს ნორმალურს, მაგრამ ამდენად გიჟიც არ მგონია, რომ იყოს. პირველობისთვის იღწვის, საუკეთესოობა უნდა, "ბარსაში" კი ახლა ცუდი დროა.
გამოსავალი კლუბის აღზდილებშია, მათ უნდა ითავონ მთავარი როლი. არა ჰოლანდიელებმა, ან ვეტერანმა "ბარსელონელებმა", არამედ, ახალგაზრდა "ლა მასიელებმა". მძიმე ტვირთია, მაგრამ ეგ არის, სხვაგვარად არ გამოვა. ჩვენი მთავარი იმედი ახლა ახალი ექიმია, სასაცილოდ კი ჟღერს, მაგრამ ასეა. ის ოქროსხელება კაცი უნდა მოვიდეს და სამედიცინო სტრუქტურა დაალაგოს, ფეხბურთელები უნდა გამოჯანმრთელდნენ, ხასიათზე მოვიდნენ და მერე.. რაღაცას დავემსგავსებით, ოღონდ, სწრაფად უნდა მოხდეს ეს ამბავი, ისე სწრაფად, რომ ჩემპიონთა ლიგის ზონაში შევაღწიოთ.
ბლოგში გამოთქმული მოსაზრებები Barcamania.ge-ს ადმინისტრაციისას ყოველთვის არ ემთხვევა და ზოგ შემთხვევაში, ის საკითხისადმი ავტორის სუბიექტურ დამოკიდებულებას გამოხატავს.
ამ სიახლეზე კომენტარები გათიშულია.
კომენტარები [ 11 ]