ოფიციალურად: მასკერანო "ბარსელონაში" რჩება

"ბარსელონას" არგენტინელი ფეხბურთელი ხავიერ მასკერანო კატალონიურ კლუბში დარჩება. ეს მას შემდეგ გახდა ცნობილი, რაც მან "ბარსასთან" ახალი, 4-წლიანი კონტრაქტის დეტალები შეათანხმა.

"ბარსელონას" ოფიციალური საიტის ცნობით, მასკერანო კლუბთან კონტრაქტს 2018 წლამდე გაახანგრძლივებს. ხელშეკრულებაში კონტრაქტის კიდევ 1 წლით ავტომატურად გაგრძელების შესახებ პუნქტიც ჩაიდება. არგენტინელის გამოსასყიდი თანხა 100 მილიონი ევრო იქნება.

ხავიერ მასკერანო "ბარსელონაში" 2010 წლიდან თამაშობს. კატალონიურ კლუბში მან 184 თამაში ჩაატრა. მასკერანომ, "ბარსასთან" ერთად, 8 ტიტული მოიგო.

"ბარსელონაში" გადასვლის შემდეგ ხავიერ მასკერანო ცენტრალურ მცველად იქცა. ბოლო დროს რამდენჯერმე გავრცელდა ინფორმაცია, რომ ლუის ენრიკე მას საყრდენ ნახევარმცველად დაბრუნებას უპირებს.