სანჩესი: "ბარსელონადან" წასვლას არ ვნანობ"
ჩილელი ფეხბურთელი თავისი ყოფილი გუნდის შესახებ საუბრობს.
მოგეხსენებათ, ალექსის სანჩესმა "ნოუ კამპი" 2014 წლის ზაფხულში დატოვა და ლონდონის "არსენალის" შემადგენლობას 35 მილიონი გირვანქა სტერლინგის სანაცვლოდ შეუერთდა. უახლოეს სამშაბათს, უეფას ჩემპიონთა ლიგის 1/8 ფინალში, ჩილელს სწორედ თავისი წინა გუნდის წინააღმდეგ დაპირისპირება მოუწევს.
"რა თქმა უნდა, "ბარსელონას" დატოვების გადაწყვეტილების მიღება ძალიან რთული იყო. როდესაც "უდინეზედან" საცხოვრებლად ესპანეთში გადავედი, ჩემი მიზანი ამ ქვეყნის ტოპ-კლუბში თამაში და ჩემპიონობის მოპოვება იყო", - აცხადებს ალექსის სანჩესი.
"თუმცა, მცირეა იმ ფეხბურთელთა რაოდენობა, რომლებიც მთელი კარიერის განმავლობაში ერთი კლუბის ღირსებას იცავენ. ასე რომ, ჩემი კატალონიიდან წასვლა ნორმალური მოვლენაა".
"რაღაც განსხვავებული, ახალი გამოწვევა მინდოდა. არ ვნანობ, რომ "ბარსელონა" დავტოვე. "არსენალში" გადასვლა სწორი გადაწყვეტილება იყო".
"ვიცით, რომ "ბლაუგრანასთან" შეხვედრა უბრალო არ იქნება. მათ რიგებში მსოფლიოს საუკეთესო ფეხბურთელი ლიონელ მესი ასპარეზობს. მისი შეჩერება რთულია, მაგრამ ამის გაკეთებას ვეცდებით. აგრეთვე, არ უნდა დაგვავიწყდეს, რომ "ბარსელონა" მხოლოდ მესი არ არის", - განაცხადა 27 წლის თავდამსხმელმა.
ამ სიახლეზე კომენტარები გათიშულია.
კომენტარები [ 35 ]