დღე, როდესაც "ბარსელონამ" ასენსიოს დუგლასი ამჯობინა
2014 წლის ზაფხულში, იმ დროს ჯერ კიდევ "მალიორკაში" მოთამაშე ამომავალი ვარსკვლავი მარკო ასენსიო "ბარსელონაში" გადასვლასთან ძალიან ახლოს იყო. კლუბები სატრანსფერო ფასზე - 4.5 მილიონ ევროზე შეთანხმდნენ. ფეხბურთელს კი, "ბარსელონაში" გადასვლის პერსპექტივა იმდენად ხიბლავდა, რომ ის კატალონიაში ჩავიდა და სახლის ძებნა დაიწყო. როგორც ცნობილია, ასენსიო, ბავშვობიდან, "ბარსელონას" გულშემატკივრობდა.
პრობლემა იმან შექმნა, რომ "მალიორკა" 4.5 მილიონი ევროს პირდაპირ გადახდას ითხოვდა, "ბარსელონას" კი თანხის განაწილება სურდა. საბოლოოდ, მხარეები ვერ შეთანხმდნენ და 18 წლის ფეხბურთელი "რეალში" გადავიდა.
იმავე ზაფხულში, "ბარსელონამ", რომელმაც ასენსიოში 4.5 მილიონი არ გადაიხადა, დუგლას პერეირა 5.5 მილიონად შეიძინა. ბრაზილიელი მარჯვენა მცველი კატალონიური კლუბის ისტორიაში ერთ-ერთ გაუგებარ ტრანსფერად იქცა.
ასენსიოს კი, გუშინ, ევროპის სუპერ თასზე, "რეალის" პირველი გუნდის შემადგენლობაში დებიუტი ჰქონდა. 20 წლის შემტევმა ლამაზი გოლი გაიტანა და ის გუნდს ტიტულის მოგებაში დაეხმარა.
ამ სიახლეზე კომენტარები გათიშულია.
კომენტარები [ 9 ]