არგენტინა მესის გარეშე კვლავ ვერ იგებს

არგენტინის ნაკრები ლიონელ მესის გარეშე კვლავ საშუალოზე დაბალი დონის გუნდია. ეს გუშინაც დამტკიცდა, როდესაც "ალბისელესტემ", დისკვალიფიცირებული კაპიტნის გარეშე, მაჩანჩალა ბოლივიასთან 0:2 წააგო.

გუშინ, FIFA-მ ლეო მესის 4-მატჩიანი დისკვალიფიკაცია მისცა. ეს შესაძლოა, არგენტინის ნაკრების მსოფლიო ჩემპიონატის ფინალური ეტაპის მიღმა დარჩენას ნიშნავდეს, რადგან ედგარდო ბაუსას გუნდი ლეოს გარეშე თამაშების მოგებას ვერაფრით ახერხებს. მესისთან ერთად გამართული 6 შეხვედრიდან გუნდმა 5 მოიგო, მის გარეშე ჩატარებული 8 მატჩიდან კი - მხოლოდ 1.

თუ მესის დისკვალიფიკაცია არ შეუმცირეს, ის ურუგვაისთან, ვენესუელასთან და პერუსთან მატჩებს გამოტოვებს.

მსოფლიო ჩემპიონატის შესარჩევი ეტაპის 14 ტურის შემდეგ, 22 ქულით, არგენტინა ფინალური ეტაპის ზღვარზე, მე-5 ადგილზეა და ეკვადორს მხოლოდ 2 ქულით უსწრებს.