ესპანურ კლუბებს მსაჯების დასაჩუქრება ეკრძალებათ

ესპანურ კლუბებს, მომდევნო სეზონიდან, არბიტრებისთვის ნებისმიერი სახის საჩუქრის გაკეთება აეკრძალებათ. ამ ინფორმაციას COPE ავრცელებს.

2016/17 წლების სეზონის თებერვალში, "ვილიარეალისა" და "რეალის" დაპირისპირებას სკანდალი მოჰყვა. ეს შეხვედრა, მადრიდულმა გუნდმა, მსაჯების დახმარებით მოიგო. მატჩის შემდეგ კი, არბიტრებმა სტადიონი "რეალის" სიმბოლიკიანი ჩანთებით დატოვეს.

მოგვიანებით, "ბარსელონას" პრესსამსახურმა გაავრცელა ინფორმაცია, რომ კაგტალონიური კლუბი გასვლით მატჩებში მსაჯების დასაჩუქრების პრაქტიკას არ იყენებს.

ამასთანავე, აღსანიშნავია, რომ "რეალი", "ბარსელონა", "ბილბაო", "სოსიედადი" და "ვილიარეალი", საშინაო მატჩების დროს, არბიტრებს კლუბის სიმბოლიკიან დროშებს, ავტოკალმებს და სხვა სიმბოლურ საჩუქრებს გადასცემენ ხოლმე.

"რეალის" საშინაო მატჩების შემთხვევაში, არბიტრს ასევე გადაეცემა მადრიდული გუნდის მაისური მისი სახელისა და თამაშის თარიღის წარწერით. როგორც წესი, ოთხივე არბიტრი "სამეფო კლუბისგან" 5 ჩანთას ღებულობს, ხოლო მატჩის დელეგატი - ერთს.

ესპანური პრესის ცნობით, ამ ყველაფერს, მომდევნო სეზონიდან, ბოლო მოეღება, ვინაიდან ლა ლიგის წარმომადგენლებმა არბიტრების დასაჩუქრების აკრძალვა გადაწყვიტეს.