სკოლარი - პაულინიო "ბარსელონაში" არ გადავა

მოგეხსენებათ, ბოლო დღეებში პრესაში გავრცელებული ინფორმაციით, "ბარსელონა" დაინტერესებულია "გუანგჟოუს" 28 წლის ბრაზილიელი ნახევარმცველით. ლუის ფელიპე სკოლარიმ კი, რომელიც აღნიშნული გუნდის მთავარი მწვრთნელია, ეს ყველაფერი უარყო.

შეგახსენებთ, რომ ჩინეთის სუპერ ლიგის ბინადარ გუნდში ფეხბურთელი შარშან 12 მილიონი ევროს სანაცვლოდ გადავიდა "ტოტენჰემიდან".

"პაულინიო არსად წავა. მისი გამოსასყიდი თანხა 40 მილიონ ევროს შეადგენს." - განაცხადა სკოლარიმ El Mundo Deportivo-სთან ინტერვიუში.

"ჩინური კლუბებისთვის ახლა მნიშვნელოვანი მოთამაშის გაშვება ძალიან ცუდი იქნება, რადგან მათი შემცვლელის პოვნა რთული და ამავდროულად, ახალი გადასახადების ფონზე, საკმაოდ ძვირიცაა."

"მისი გადასვლის მცირე შანსებიც რომ არსებობდეს, მეცოდინებოდა. თუმცა ჩემამდე ჯერ-ჯერობით არანაირ ინფორმაციას არ მოუღწევია."

შეგახსენებთ, რომ ბრაზილიელ ნახევარმცველს "ბარსელონას" 2013 წელსაც უკავშირებდნენ, თუმცა მან "კორინთიანსიდან" კარიერა "ტოტენჰემში" გააგრძელა.