ვერატის აგენტი, შესაძლოა, "ბარსელონას" წარმომადგენლებს შეხვდეს

მარკო ვერატი "ბარსელონას" უმთავრეს სატრანსფერო მიზნად რჩება. 24 წლის იტალიელი ამჟამად ამერიკის შეერთებულ შტატებში იმყოფება და ემზადება "რომასთან" მატჩისთვის, რომელიც ხვალ გაიმართება. მას შემდეგ, რაც იგი უნაი ემერის გუნდს შეუერთდა (7 ივლისი), ნახევარმცველის საქმეში არაფერი არ შეცვლილა. "ბარსელონას" ვერატი სურს, ვერატის "ბარსელონა", მაგრამ პსჟ უარზეა.

მიუხედავად ამისა, ვერატი იმედს არ კარგავს, რადგან იზიარებს კატალონიური კლუბის მოსაზრებას, რომლის თანახმადაც სატრანსფერო ფანჯრის დახურვამდე 7 კვირაა დარჩენილი და ყველაფერი შეიძლება შეიცვალოს. შესაბამისად, საჩქარო არაფერია.

Mundo Deportivo-ს ინფორმაციით, იტალიელი ფეხბურთელის აგენტი შტატებში ვიზიტს გეგმავს, რათა "პარი სენ-ჟერმენი"-"იუვენტუსის" მატჩს დაესწროს. იმავე სტადიონზე კი, რომელიც ამ შეხვედრას უმასპინძლებს, 3 დღის შემდეგ "ელ კლასიკო" გაიმართება.

შესაბამისად, პრესა არ გამორიცხავს, რომ მაიამიში ერთმანეთს დონატო დი კამპლი და "ბარსელონას" წარმომადგენლები შეხვდნენ. აღსანიშნავია ისიც, რომ ამერიკაში წასვლას ხოსეპ მარია ბართომეუც გეგმავს. მაიამიში "ბარსელონა" 27 ივლისს ჩავა, ვაშინგტონში "მანჩესტერ იუნაიტედის" წინააღმდეგ მატჩის შემდეგ.