ბართომეუ ბარაკ ობამას შეხვდა

"ბარსელონას" პრეზიდენტი ხოსეპ მარია ბართომეუ, ლენდოვერში, მერილენდში, ამერიკის შეერთებული შტატების 44-ე პრეზიდენტს, ბარაკ ობამას შეხვდა.

ბარაკ ობამა "ბარსელონასა" და "მანჩესტერ იუნაიტედს" შორის გამართული ამხანაგური შეხვედრის საპატიო სტუმრებს შორის იყო. შესვენებაზე, ის ბართომეუს სტადიონის ერთ-ერთ ვიპ ლოჟაში შეხვდა.

ობამასთან შეხვედრის დროს, ბართომეუმ ხაზი "ბარსელონას" საქველმოქმედო ფონდის აშშ-ში საქმიანობას, ასევე კატალონიელთა ახალგაზრდულ აკადემიასა და ქალთა ფეხბურთს გაუსვა. მხარეებმა "ბარსელონას" ფონდისა და ობამას სამომავლო თანამშრომლობაზე ისაუბრეს.

შეხვედრის ორგანიზებაზე ესპანეთში ამერიკის ყოფილმა ელჩმა, ამჟამად ჩრდილოეთ ამერიკაში "ბარსელონას" წარმომადგენელმა, ხამეს კოსტოსმა იზრუნა.