ყოფილმა არბიტრებმა ბარსა-ალავესის მატჩი განიხილეს

როგორც უკვე იცით, ფიფას ყოფილი არბიტრი, იტურალდე გონსალესი გუშინდელი მატჩის ("ბარსელონა" - "ალავესი" 2:1) ეპიზოდს გამოეხმაურა, სადაც, 88-ე წუთზე, კატალონიელთა მცველმა, სამუელ უმტიტიმ თავის საჯარიმო მოედანში ხელით ითამაშა.

"პენალტის არ დანიშვნით, მსაჯმა სწორი გადაწყვეტილება მიიღო. უმტიტის ხელი ბუნებრივ მდგომარეობაში იმყოფებოდა.

გარდა ამისა, მუნირმა დარტყმა ახლო მანძილიდან განახორციელა და მცველს ხელის გაწევის დრო არ ჰქონდა."

აგრეთვე, შეაფასეს სხვა მომენტებიც:

ფიფას ყოფილი რეფერი, ანდუხარ ოლივერი, რომელიც ახლა გამოცემა Marca-ს ექსპერტია მიიჩნევს, რომ არბიტრთა ბრიგადამ 72-ე წუთზე ლუის სუარესის გოლი სწორად ჩათვალა. ამ ეპიზოდში ბურთი ჟერარ პიკეს ხელს შეეხო, რაზეც ექსმსაჯი ასეთ განცხადებას აკეთებს: "არბიტრები სწორად მოიქცნენ. ბურთი პიკეს შემთხვევით მოხვდა და ეს არავითარ შემთხვევაში არ არის ხელით თამაში. ჟერარი კონტაქტის არიდებას ცდილობდა".

იტურალდე გონსალესი და ანდუხარ ოლივერი ერთხმად აღიარებენ, რომ: "არბიტრს თამაშგარე მდგომარეობა აუცილებლად უნდა დაეფიქსირებინა". საუბარია 84-ე წუთზე დაფიქსირებულ დარღვევაზე, სადაც, მსაჯების შეცდომის შემდეგ ლეო მესიმ საჯარიმო დარტყმა ზუსტად შეასრულა.

"ალავესის" ნახევარმცველმა, მუბარაქ ვაკასომ ტრადიციულად, უხეში შეხვედრა ჩაატარა და მას ერთ-ერთ ეპიზოდში მოედანი უნდა დაეტოვებინა. კიდევ ერთი ესპანელი ექს-არბიტრი, რაფა გერერო მიიჩნევს, რომ "ვაკასოს შეეძლო სერიოზული ტრავმა მიეყენებინა კოუტინიოსთვის და მან ეს განზრახ გააკეთა".