"ბარსელონას" მაისურის ფასი მომავალი სეზონიდან 200 მილიონ ევროზე მეტი იქნება

"ბარსელონას" პრეზიდენტმა ჟოზეპ მარია ბართომეუმ და კლუბის სპონსორებმა ახალ კონტრაქტებს მოაწერეს ხელი. განახლებული პირობების თანახმად, ცნობილი კომპანიები "ბლაუგრანას" მაისურის საკუთარი ლოგოთი გასაფორმებლად უფრო მეტს გადაიხდიან

"ბარსელონა" Beko-სგან ახალი კონტრაქტის მიხედვით 19 მილიონ ევროს მიიღებს, რის სანაცვლოდაც ცნობილი კომპანიის ლოგო მაისურის მარცხენა მკლავზე და სავარჯიშო სამოსის წინა და უკანა მხარეს განთავსდება.

"ბლაუგრანას" ხელმძღვანელები ასევე Rakuten-სგანაც მიიღებენ უფრო დიდ თანხას. იაპონელი სპონსორები ივნისის შემდეგ მაისურზე დატანებული რეკლამის სანაცვლოდ 105 მილიონ ევროს გადაიხდიან. საერთო ჯამში აღნიშნული გარიგებიდან მიღებული შემოსავალი სავარაუდოდ 155 მილიონ ევროს მიაღწევს, რადგან კონტრაქტის მიხედვით Rakuten-ი ესპანური კლუბის ოფიციალური მაღაზიის ლიცენზიის მფლობელიც გახდება.

ამასთანავე, პარალელურად დამატებით Nike-თან და კლუბის სხვადასხვა რეგიონალურ სპონსორებთან გაფორმებული ხელშეკრულებების შედეგად, "ბარსელონას" მაისურის ფასი 2018 წლის ზაფხულიდან 235.5 მილიონი ევრო იქნება.