კლარენს ზეედორფის აზრი საპატიო დერეფანთან დაკავშირებით
"ბარსელონას" დღევანდელი მეტოქის, "დეპორტივოს" მთავარი მწვრთნელი, "რეალის" ყოფილი ნახევარმცველი კლარენს ზეედორფი კატალონიელებთან მატჩის წინ საინტერესო კომენტარს აკეთებს.
ზეედორფი "რეალის" მიერ "ბარსელონასთვის" საპატიო დერეფნის გაკეთება/არგაკეთების თემას ეხმაურება. იმ შემთხვევაში, თუ დღეს "ბარსამ" ლა კორუნიაში ქულა მაინც აიღო, ჩემპიონი ხდება და ესპანეთში არსებული ტრადიციის თანახმად, მომდევნო მეტოქეს, ამ შემთხვევაში "რეალს", საპატიო დერეფნის გაკეთება უწევს. თუმცა, მადრიდელთა დამრიგებელმა, ზინედინ ზიდანმა განაცხადა, რომ მისი გუნდი ამას არ აპირებს.
"მე მადრიდისტა ვარ, მაგრამ ასევე ვარ UEFA-ს ელჩი. ფეარ ფლეი მნიშვნელოვანია. საპატიო დერეფანი შესანიშნავი ჟესტია.
ვფიქრობ, ესპანეთში, საპატიო დერეფანი ჩვეულებრივი რამაა და ახალგაზრდებისთვის მისაბაძი საქციელია. მნიშვნელოვანია, რომ ეს დიდმა გუნდებმა და ფეხბურთელებმა გააკეთონ.
"ბარსელონა" "რეალის" გარეშე ასეთი ვერ იქნებოდა და პირიქით." - ციტირებს ჰოლანდიელის სიტყვებს Tribal Football.
აქვე შეგახსენებთ, რომ "დეპორტივო" აპირებს, დღევანდელი მატჩის წინ, "ბარსელონას", ესპანეთის თასის მოგების გამო, საპატიო დერეფანი გაუკეთოს.
ამ სიახლეზე კომენტარები გათიშულია.
კომენტარები [ 13 ]