"ბარსელონა" "უესკასთან" მატჩისთვის ემზადება [ვიდეო]

"სიუტატ ესპორტივაზე", წვიმას "ბარსელონას" ფეხბურთელებისთვის ვარჯიშში ხელი არ შეუშლია. გუნდი ლა ლიგის მე-3 ტურის მატჩისთვის ემზადება: 2 სექტემბერს, "კამპ ნოუს" პრიმერა დივიზიონის დებიუტანტი, "უესკა" ესტუმრება. 

დღევანდელ სესიაში მონაწილეობა პირველი გუნდის მოთამაშეებთან ერთად ახალგაზრდა მეკარემ, ლაზარ ცარევიჩმა მიიღო, რომელიც, შესაძლოა, მატჩის განაცხადში მოხვდეს. იასპერ სილესენი და დენის სუარესი კი გამოჯანსაღების პროცესის გავლას აგრძელებენ.

"ბარსა" 100%-იანი შედეგის შენარჩუნებას ეცდება. როგორც გახსოვთ, კატალონიელებმა აქამდე გამართული ორივე მატჩი მოიგეს და სატურნირო ცხრილს მადრიდის "რეალთან" ერთად ლიდერობენ. 

სეზონი "უესკამაც" საკმაოდ კარგად დაიწყო: სადებიუტო მატჩში მათ სტუმრად "ეიბარი" 2-1 დაამარცხეს, შემდეგ კი "ბილბაოსთან", ასევე გასვლაზე, ქულა აიღეს (2-2).