"ბარსელონა" ჩენგის უნდერით დაინტერესდა

იტალიური "რომას" ახალგაზრდა თურქი ვინგერი, ჩენგის უნდერი კატალონიის "ბარსელონას" ინტერესთა სფეროში მოხვდა, იტყობინება ბრიტანული გამოცემა Sky Sports.

"ლურჯ-ბროწეულისფერთა" სპორტული დირექტორი არიედო ბრაიდა უნდერისთვის დასაკვირვებლად იტალიაში გაფრინდა და "ფიორენტინა" - "რომას" დაპირისპირებას დაესწრო.

გუშინ უნდერისთვის საუკეთესო თამაში ნამდვილად არ ყოფილა, მის შეცდომას მოჰყვა რომაელთა კარში დანიშნული პენალტი. თურქი შემტევი დი ფრანჩესკომ შეხვედრის 73-ე წუთზე მოხსნა თამაშიდან.

პირველ რომაულ სეზონში უნდერმა 7 გოლის გატანა მოახერხა. მიმდინარე სეზონში ჩატარებულ 12 შეხვედრაში კი მეტოქის კარი 3-ჯერ აიღო, შედეგიანი გადაცემა კი 5-ჯერ მიითვალა.

21 წლის ნიჭიერი თურქის კონტრაქტი "რომასთან" 2022 წლამდეა გათვალისწინებული, მისი სატრანსფერო ფასი ამ დროისათვის 27 მილიონ ევროს შეადგენს.