"ბარსელონას" სატრანსფერო ფანჯრის გეგმა

ახლა, როცა სატრანსფერო ფანჯარა ოფიციალურად გაიხსნა, "ბარსელონამ" შეადგინა გეგმა, რომლის შესრულებასაც შემდეგი ორი თვის განმავლობაში შეეცდება, იტყობინება Mundo Deportivo.

ანტუან გრიზმანი

დღეს, ფრანგის სატრანსფერო ღირებულება 120 მილიონ ევრომდე დაეცა, მაგრამ "ბარსელონა" "ატლეტიკოსთან" მოლაპარაკებების გამართვას შეეცდება, რათა ამ თანხის შემცირება შეძლოს. თუმცა, თუ ეს ყველაფერი უშედეგო აღმოჩნდა, კატალონიელები გრიზმანს 120 მილიონ ევროდ გამოისყიდიან. "ბლაუგრანას" უნდა, რომ ფრანგის პრეზენტაცია 14 ივლისამდე გაიმართოს.

ნელსონ სემედუ

იმის მიუხედავად, რომ მასთან დაკავშირებით რამდენიმე ჭორი გავრცელდა, "ბარსელონა" არ აპირებს პორტუგალიელის გაყიდვას.

ჟან-კლერ ტოდიბო

კლუბმა "სელტას" შემოთავაზება დაბლოკა. კატალონიელები მას შემდეგი სეზონისთვის მეოთხე ცენტრალურ მცველად განიხილავენ. ერნესტო ვალვერდე ფრანგს ენდობა. გავრცელებული ცნობების თანახმად, ფეხბურთელს შემდეგ სეზონში 15-20 თამაშის ჩატარება სურს.

მარცხენა მცველი

ლუკა დინის გაშვების შემდეგ, ჟორდი ალბას დუბლიორი კლუბს არ მოუყვანია. შემდეგ სეზონში ამ როლის მორგების მთავარ კანდიდატად ფილიპე ლუისი განიხილება.

ნეიმარი

ამ მომენტისთვის, "ბარსელონასთვის" ნეიმარის ტრანსფერი პრიორიტეტული არ არის. კატალონიელები კონცენტრირებულები არიან ანტუან გრიზმანის კლუბში მოყვანაზე.

გაყიდვები

კლუბი უკვე დატოვეს იასპერ სილესენმა, დენის სუარესმა, ანდრე გომეშმა და მარკ კარდონამ. მოსალოდნელია, რომ "ბარსელონას" კიდევ მინიმუმ სამი ფეხბურთელი დატოვებს (მთავარი კანდიდატები - რაფინია, მარკ კუკურელია, სერჟი პალენსია). ასევე, წყაროს ცნობით, კატალონიურ კლუბში ფილიპე კოუტინიოს, მალკომისა და უსმან დემბელეს მომავალი კითხვის ნიშნის ქვეშ დგას - მათი ბედი ნეიმარის ტრანსფერზე იქნება დამოკიდებული.