"ბარსას" ახალი შეთავაზება და პსჟ-ს უარი

დღეს, Mundo Deportivo-მ ნეიმარის ტრანსფერზე "ბარსელონას" ახალი შეთავაზების დეტალები გააჟღერა.

RAC1-ის მიერ მანამდე გავრცელებული ინფორმაციით, "ბარსელონა" ნეიმარის ტრანსფერში ფილიპე კოუტინიოს ფორმულის გამოყენებას აპირებდა - იჯარა თანხის გადახდით და არასავალდებულო გამოსყიდვით.

Mundo Deportivo ამ მოსაზრებას იზიარებს. კატალონიელი ჟურნალისტების ცნობით, "ბარსელონამ" პსჟ-ს ასეთი პირობები შესთავაზა: ერთწლიან იჯარაში "ბლაუგრანა" 15-20 მილიონ ევროს გადაიხდის, სეზონის შემდეგ კი კატალონიელებს ფეხბურთელის 150 მილიონ ევროდ გამოსყიდვის უფლება ექნებათ.

იმავე წყაროს ცნობით, ნეიმარის წარმომადგენლები გარიგებაში სავალდებულო გამოსყიდვის პუნქტის დამატებას ითხოვენ, მაგრამ "ბარსას", ფეხბურთელის ტრავმიანობის გათვალისწინებით, თავის დაზღვევა სურს.

ვრცელდება ინფორმაცია, რომ "პარი სენ-ჟერმენი" ამ შეთავაზებაზე უარის თქმას აპირებს.