"ინტერი" "ბარსელონასთან" თამაშს კარგი განწყობით ხვდება

მომდევნო ოთხშაბათს, 2 ოქტომბერს, ჩემპიონთა ლიგის მე-2 ტურის მატჩში, "ბარსელონა" მილანის "ინტერს" უმასპინძლებს.

საჩემპიონთალიგო შეხვედრას ორივე გუნდი კარგი განწყობით ხვდება. "ბარსელონამ", დიდი დანაკლისის მიუხედავად, "ხეტაფე" სტუმრად დაამარცხა, "ინტერმა" კი, ასევე სტუმრად, "სამპდორიას" სძლია.

რომ არა ჩემპიონთა ლიგის პირველ ტურში "სლავიასთან" ქულების საკუთარ კედლებში დაკარგვა, მიმდინარე სეზონის სტარტს "ინტერისთვის" იდეალური ერქმეოდა. ანტონიო კონტეს გუნდს, რომელიც ზაფხულში ძალიან გაძლიერდა, სერია A-ს 6 მატჩში ქულათა მაქსიმუმი დაუგროვდა. რა გასაკვირია, რომ "ნერაძური" გათამაშებას ლიდერობს.

დღეს, "ინტერმა" "სამპდორიას", გენუაში, 3:1 მოუგო. შეხვედრის პირველი 2 გოლის ავტორი "ბარსელონას" ყოფილი ფეხბურთელი ალექსის სანჩესია. 55-ე წუთზე მასპინძლებმა ერთი ბურთი კი გაქვითეს, მაგრამ 6 წუთში გალიარდინიმ ორბურთიანი უპირატესობა აღადგინა და შეხვედრის საბოლოო ანგარიშიც დააფიქსირა.