რაფა მარკესი: მესი გამიბრაზდა და მიყვიროდა, სანამ გვარდიოლამ არ დააწყნარა

მექსიკელი ყოფილი ფეხბურთელი, რაფა მარკესი, რომელიც "ბარსელონას" ღირსებას 2003-10 წლებში იცავდა, ლიონელ მესისთან დაკავშირებულ ეპიზოდს იხსენებს. 

"ვარჯიშის დროს 7-7-ზე ვთამაშობდით და ლეო ჩემს გუნდში იყო. 

მან ბურთი მიიღო და ერთი ფეხბურთელი ჩამოიტოვა, შემდეგ მეორე, შემდეგ მესამე, შემობრუნდა და ისინი ისევ მოატყუა. ბურთი ერთი წამითაც არ გაუშვია. შემდეგ მე დავუყვირე: "ლეო, გაუშვი!"

ის ისე გაბრაზდა, რომ ყვირილი დაიწყო, ჩემთან მოვიდა და კამათი დავიწყეთ, სანამ პეპ გვარდიოლა არ მოვიდა და დააწყნარა. 

როცა მესი ძალიან ახალგაზრდა იყო, მის შესახებ ბევრი გვესმოდა. ვიცოდით, რომ "ბარსა ბ"-ში საოცრებებს აკეთებდა და ახალ დიეგო მარადონად მივიჩნევდით. მისი ზრდის პროცესს დავესწარი და ეს შესანიშნავი იყო".