"ბარსელონამ" და "ინტერმა" მოლაპარაკებები დაიწყეს

"ბარსელონამ" და "ინტერმა", ივან რაკიტიჩის ტრანსფერთან დაკავშირებით, მოლაპარაკებები დაიწყეს. ამ ინფორმაციას კატალონიური Sport ავრცელებს.

წყაროს ცნობით, მილანელთა სპორტული დირექტორი პიერო აუზილიო 31 წლის ხორვატ ნახევარმცველს ახალი "ინტერის" მნიშვნელოვან წევრად მოიაზრებს და მისი იანვარში გადაბირების სურვილს გამოთქვამს.

"ბარსელონა" მზადაა 35 მილიონად გაყიდოს ფეხბურთელი, რომელმაც მიმდინარე სეზონში თავისი ადგილი აშკარად დაკარგა და დროის უდიდეს ნაწილს სათადარიგოთა სკამზე ატარებს. იმის გამო, რომ ხორვატის ფასი ბოლო დროს დაეცა, კატალონიელები მზად არიან თანხის რამდენიმე ნაწილად მიღებას დასთანხმდნენ.

Sport-ის ცნობით, "ბარსელონასა" და "ინტერს" ერთმანეთთან კარგი ურთიერთობა აქვთ და მათ შეთანხმების მიღწევა არ გაუჭირდებათ, თუმცა საბოლოო სიტყვა თავად ფეხბურთელმა უნდა თქვას.