ოსკარ გარსია: მესის გაკონტროლება შეუძლებელია

46 წლის ესპანელ სპეციალისტს, ოსკარ გარსიას, "სელტას" მთავარი მწვრთნელის პოსტზე დებიუტი "კამპ ნოუზე", "ბარსელონას" წინააღმდეგ (4-1) ჰქონდა.

ოსკარ გარსია "ბარსელონას" სკოლის აღზრდილია. ის კატალონიელთა აკადემიაში 9 წელი, ხოლო პირველ გუნდში 6 წელი ირიცხებოდა. ბუნებრივია, ახალი გუნდის მთავარ მწვრთნელად "კამპ ნოუზე" დებიუტი, მისთვის, განსაკუთრებული იყო.

"ჩემი, როგორც ფეხბურთელის დებიუტი "ბარსელონაში" შედგა. ამ კლუბში 9 წლის ასაკიდან ვვარჯიშობდი და ეს ადგილი, ჩემთვის, განსაკუთრებულია. "სელტას" მთავარ მწვრთნელად აქ დებიუტი, შედეგის მიუხედავად, ის მოგონებაა, რომელიც ყოველთვის მემახსოვრება.

მესი... მისი გაკონტროლება შეუძლებელია. ის ყველაფერს ცვლის. მის გარეშე თამაში სხვანაირი იქნებოდა.

ტაიმის ბოლოს მესის მიერ გატანილმა მეორე გოლმა დიდი დარტყმა მოგვაყენა. ბურთის ფლობაში უფრო გაბედულები უნდა ვყოფილიყავით, მაგრამ ჩემი გუნდის თამაშით კმაყოფილი ვარ." - აცხადებს ოსკარ გარსია.