ინსინიეს აგენტი: თუ ლორენცო ჩათვლის, რომ 80%-ით ფორმაშია, "ბარსელონასთან" აუცილებლად ითამაშებს

იტალიის ჩემპიონატის ბოლო ტურში მიღებული ტრავმის შემდეგ, "ნაპოლის" კაპიტნის, ლორენცო ინსინიეს "ბარსელონასთან" თამაში კითხვის ნიშნის ქვეშ დადგა. 

თავიდან დაზიანება მძიმე ჩანდა, თუმცა ინსინიემ ვარჯიში განაახლა და მისი აგენტის განცხადებით, მას თამაშის შანსი აქვს. ვიჩენცო პისაკანე დღეს რადიო Punto Nuovo-ს ესაუბრა. 

"ლორენცო ოპტიმისტურად არის განწყობილი. მას ძალიან უნდა, რომ ითამაშოს. ფეხბურთელი საკუთარი თავის საუკეთესო ექიმია და თუ ის იგრძნობს, რომ 80%-ით მაინც არის ფორმაში, მოედანზე აუცილებლად გავა. მას დღეს ვესაუბრე და მითხრა, რომ შეხვედრაში მონაწილეობის მისაღებად ყველაფერს გააკეთებს, რაც შეუძლია. 

ინსინიე ცრემლებად დაიღვარა, როცა გაიაზრა, რომ შეიძლებოდა, "ბარსელონას" წინააღმდეგ ვერ ეთამაშა". - თქვა იტალიელმა. 

"ბარსა" და "ნაპოლი" ერთმანეთს "კამპ ნოუზე" 8 აგვისტოს დაუპირისპირდებიან. შეგახსენებთ, რომ პირველი შეხვედრა ფრედ, 1-1 დასრულდა.