MD: კუმანი ორი საყრდენით ითამაშებს

იქამდე, სანამ "ბარსელონა", რონალდ კუმანის ხელმძღვანელობით პირველ შეხვედრას ჩაატარებს, მხოლოდ ვარაუდების იმედად ვრჩებით. აქამდე ტაქტიკაზე მხოლოდ ერთი რამ თქვა - "თუ რადიკალური ცვლილება გახდა საჭირო, პულსიც არ ამიჩქარდება". ცვლილებები აქამდეც გვინახავს, ყველაზე მეტად ვალვერდეს ხელში, აი სეტიენი რას აკეთებდა, რთული გასაგები იყო და ჩვენ კი არა, ფეხბურთელებმაც ვერაფერი გაიგეს.

MD გამოთქვამს მოსაზრებას, რომ კუმანი ორი საყრდენით ითამაშებს და 4-2-3-1 სქემას აირჩევს. ამ ტაქტიკაში ყველაზე მეტად "ბარსას" შემტევი ნახევარმცველები იზღუდებიან, მაგალითად რიკი პუჩი, რომელსაც სათამაშო დრო აუცილებლად სჭირდება, მისთვის მხოლოდ ერთი პოზიციაა ვაკანტური, საყრდენების წინ და ფორვარდის უკან, ე.წ. ათიანზე, სადაც სეტიენმა რამდენჯერმე ათამაშა. 

ჯერჯერობით არ ვიცით რა პოზიციაზე განიხილავს კუმანი მესის, საერთოდ თუ განიხილავს მათი შეხვედრის მერე, ეგეც საკითხავია. თუმცა, აღნიშნულ ტაქტიკურ სქემაში, მესის ადგილი სწორედ ათიანზეა. ის ვეღარ ითამაშებს მარჯვენა შემტევად, რადგან აუცილებლად მოეთხოვება დაცვაში მუშაობა, მესის კი ამის ფიზიკური ძალა უკვე აღარ შესწევს. მით უმეტეს, რომ მთელი სეზონი აქვს სათამაშო.

კარგი ამბავია საყრდენებისთვის, თუმცა ბუსკეტს მაინც მოუწევს კონკურენცია. დე იონგს რომ ულაპარაკოდ ძირითადში განიხილავს, კუმანმა ეს უკვე გვამცნო, მისი მეწყვილე ხან ბუსკეტსი იქნება, ხანაც მირალემ პიანიჩი, მაგრამ თუ კუმანმა საწადელი აისრულა და ვეინალდუმი გადმოიბირა, ორივეს სკამზე მოუწევს დარჩენა, ძირითადში კი ჰოლანდიელები იქნებიან.

ბევრი რამ მაინც გაუგებარია და MD-ს ვარაუდებიც არ იძლევა იმის საშუალებას, რომ რამეში მაინც გავერკვიოთ, მაგალითად, ვიცით, რომ კუმანს სუარესი არ სჭირდება, ეს კი შეცდომა მგონია, რადგან ლუისმა მზადყოფნა გამოთქვა, თუ საჭიროა გუნდს სკამიდან დავეხმარებიო. ურუგვაელი ამ მსხვერპლისთვის მზად არის, გრიზმანი და ლაუტარო კი - არა. მათ მხოლოდ ძირითადი დააკმაყოფილებთ და ისე ჩანს, რომ თუ ტრანსფერი შედგა, კონკურენტებიც იქნებიან. შედგება თუ არა გარიგება, მეორეხარისხოვანია, აქ აქცენტი კუმანის გეგმაზეა, რაში სჭირდება ლაუტარო, თუ გრიზმანს ცენტრფორვარდად დაყენებას უპირებს?!

ნაკლები თავსატეხი არც გარემარბებს ექნებათ. "ქერა ბულდოგმა" მემფის დეპაის ტრანსფერი მოითხოვა. ის კი ზუსტად იქ თამაშობს, სადაც უსმან დემბელე და ანსუ ფატი. თუ დეპაი "ბარსაში" გადმოვიდა, დემბელეს ძალიან გაუჭირდება ადგილის დამკვიდრება, ან დააყენებს მარჯვენა ფლანგზე და მისცემს იგივე დავალებას, რასაც "დორტმუნდში" ასრულებდა.

არ დაგვავიწყდეს ფილიპე კოუტინიო, რომელსაც ასევე დარჩენას უწინასწარმეტყველებენ, ამ სქემაში მისი ადგილიც ათიანზეა. სხვაგან უბრალოდ წარმოუდგენელია, თუ ვალვერდესავით ექსპერიმენტებს არ მიჰყო ხელი, ეს კი ნაკლებ სავარაუდოა, რადგან პრესკონფერენციაზე, სწორედ ამაზე ისაუბრა და ექსპერიმენტები გამორიცხა. 

საბოლოოდ შეგვიძლია ვთქვათ, რომ Mundo Deportivo-ს ჟურნალისტებს ისევე არ აქვთ წარმოდგენა კუმანის გეგმების შესახებ, როგორც დანარჩენ მსოფლიოს. იმედს ვიტოვებ, რომ თავად კუმანმა კარგად იცის რასაც აკეთებს.

MD-ს მიხედვით ასეთი სურათი იკვეთება.

• საყრდენ ზონაში: დე იონგი და პიანიჩი (შემცვლელად ბუსკეტსი. მიდის მუშაობა ვეინალდუმის ტრანსფერზე);
• ათიანზე: მესი, პუჩი, შესაძლებელია ანტუან გრიზმანიც (მიდის მუშაობა კოუტინიოს დასაბრუნებლად);
• ფორვარდი: გრიზმანი (თუ ლაუტარო მოვა, სუარესი წავა);
• მარცხენა გარემარბი: უსმან დემბელე, ანსუ ფატი (მიდის მუშაობა მემფის დეპაის გასაფორმებლად);
• მარჯვენა გარემარბი: თუ ამ პოზიციაზე მესის ათამაშებს, მაშინ დაცვითი სქემის დარღვევაც მოუწევს, რადგან ლეო მთელი თამაში უკან ვერ ირბენს. სხვა მხრივ კი შეუძლია დემბელე ან ტრინკაუ დააყენოს.