სენსაცია ქალთა ფეხბურთში - "ბარსა" ფინალს მიღმა დარჩა

13 იანვარს "ბარსელონას" ესპანეთის სუპერ თასზე 2 თამაში ელოდა - კაცებში "სოსიედადთან" და ქალებში "ატლეტიკოსთან".

მიუხედავად იმისა, რომ ქალების "ატლეტიკო" ესპანეთის მასშტაბით ძალიან ძლიერი გუნდია, კაცების "სოსიედადი" კი ბოლო დროს ძალიან ცუდად გამოიყურება, მოგებას უპირველსად მაინც "ბარსას" ქალების გუნდისგან ველოდით. რატომ? იმიტომ, რომ კატალონიელებს ესპანეთის მასშტაბით უკონკურენტო გუნდი ჰყავთ. ყოველ შემთხვევაში, რამდენიმე საათის წინ ასე გვეგონა.

ლა ლიგასა და ჩემპიონთა ლიგაზე ჩატარებულ 13 თამაშში 13 მოგება, გატანილი უამრავი და გაშვებული მხოლოდ 3 გოლი. ასეთი იყო "ბარსელონას" ქალთა გუნდის მონაგარი მიმდინარე სეზონში.

"ბარსა" "ატლეტიკოსთანაც" ფავორიტად მიიჩნეოდა. კატალონიელები მთელი თამაშის განმავლობაში დიდ უპირატესობას ფლობდნენ და ქალთა ფეხბურთში ვიდეორეფერი რომ იყოს დანერგილი, ძირთად დროშივე ადვილად მოიგებდნენ, მაგრამ 90 წუთში 1-1 დაფიქსირების შემდეგ საჭირო ჯერ დამატებითი ტაიმები, შემდეგ კი პენალტების სერია გახდა საჭირო.

თერთმეტმეტრიანებში მოვლენები ისე განვითარდა, როგორც მამაკაცთა ფეხბურთში, "ბარსელონასა" და "სოსიედადის" შეხვედრაში, ოღონდ პირიქით - პირველი 3 დარტყმა "ბლაუგრანამ" გააფუჭა და საბოლოოდ 1-3 დამარცხდა.

ეს ქალთა ფეხბურთში ესპანეთის სუპერ თასის მე-2 გათამაშებაა. შარშან "ბარსა" ნახევარფინალში ასევე "ატელტიკოს" შეხვდა და ასევე დაძაბულ ბრძოლაში 3-2 იმარჯვა, ფინალში კი "სოსიედადი" 10-1 გაანადგურა. მადრიდული ბარიერის დაძლევის შემთხვევაში "ბლაუგრანას" ფინალში მოგება ახლაც თითქმის განაღდებული ჰქონდა.