ბარსელონურ კარიერაში პირველად - მესი მოედნიდან გააძევეს

"ბარსელონას" ლეგენდარული ფეხბურთელი, ლიონელ მესი ბილბაოს "ატლეტიკთან" ცოტა ხნის წინ დასრულებულ ფინალში მოედნიდან გააძევეს.

არგენტინელს წითელი ბარათი მატჩის მთავარმა არბიტრმა, ხესუს ხილ მანსანომ 121 წუთზე, ასიერ ვილიალიბრესთვის ხელის ჩარტყმის გამო უჩვენა.

Opta-ს მიერ გავრცელებული ინფორმაციით, ხსენებული გაძევება "ლა პულგასთვის" კატალონიურ კარიერაში პირველია, ხოლო კარიერაში - მესამე. 33 წლის თავდამსხმელი "ბარსას'" რიგებში 753 მატჩის ჩატარების შემდეგ გააგდეს.

პირველად ლეომ წითელი ბარათი 2005 წელს, არგენტინის ნაკრებში მიიღო, როდესაც უნგრეთთან შეხვედრაში შეცვლაზე შემოვიდა. მეორედ, ასევე "ალბისელესტეს" მაისურით, მესის მოედნის ნაადრევად დატოვება 2019 წლის კოპა ამერიკის მესამე ადგილისთვის მატჩში, ჩილესთან შეხვედრაში, გარი მედელთან დაპირისპირების შედეგად მოუწია.

Diario AS-ის ინფორმაციით, მესის ერთიდან 4 მატჩამდე დისკვალიფიკაცია ემუქრება, მაგრამ თუ სადისციპლინო კომიტეტმა საჭიროდ ჩათვალა, შესაძლოა, სასჯელი კიდევ უფრო მკაცრი იყოს.