სტატისტიკური მაჩვენებლები, რომლებითაც "ბარსელონა" ლა ლიგაში საუკეთესოა

იმის მიუხედავად, რომ პირველ ადგილზე მყოფ მადრიდის "ატლეტიკოსთან" ქულებით ჩამორჩენა ჯერ კიდევ საკმაოდ დიდია, "ბარსელონა" ლა ლიგის გუნდებს რამდენიმე მნიშვნელოვანი სტატისტიკური მაჩვენებლის მიხედვით უსწრებს. 

სტატისტიკური აპლიკაცია FotMob-ის მიხედვით, "ბარსა" ესპანეთის ჩემპიონატის მიმდინარე სეზონში პირველ ადგილზე შემდეგ კომპონენტებშია:

• ბურთის ფლობის საშუალო მაჩვენებელი (64.3%)
• ზუსტი პასების საშუალო მაჩვენებელი (607.9)
• ყველაზე მეტი სახიფათო მომენტი (49)
• გოლების რაოდენობის საშუალო მაჩვენებელი (2.1)
• ზუსტი დარტყმების საშუალო მაჩვენებელი (6.9)

რონალდ კუმანის გუნდმა ბოლო დროს შედეგები საგრძნობლად გამოასწორა, თუმცა ქულებს არც "ატლეტიკო" კარგავს და 8 ქულიანი უპირატესობა აქვს, თანაც ერთით ნაკლები ჩატარებული მატჩი. 21 ტურის შემდეგ "ბარსას" ანგარიშზე 43 ქულაა. ხვალ "კამპ ნოუზე" "ალავესთან" გამარჯვების შემთხვევაში კატალონიელები ქულებით "რეალს" გაუთანაბრდებიან და ბურთების უკეთესი სხვაობის გამო ცხრილში ისევ მეორე პოზიციას დაიკავებენ.