ლაპორტას ფავორიტი მიკელ არტეტაა | RAC1

ცნობილი ესპანელი ჟურნალისტი ხერარდ მორენო "ბარსელონას" მთავარი მწვრთნელის პოზიციაზე ჟოან ლაპორტას გეგმების შესახებ ინფორმაციას ავრცელებს.

RAC1-ის ჟურნალისტის ცნობით, საპრეზიდენტო არჩევნებში ლაპორტას გამარჯვების შემთხვევაში რონალდ კუმანის შეცვლის მთავარი კანდიდატი მიკელ არტეტა იქნება. ლაპორტას გუნდის წევრებს მიაჩნიათ, რომ მათ პროექტს ყველაზე მეტად სწორედ არტეტა შეესაბამება.

მიკელ არტეტა "ბარსელონას" სკოლის აღზრდილია, თუმცა მას კატალონიელთა პირველ გუნდში არასდროს უთამაშია. კარიერის უდიდესი ნაწილი მან ინგლისში, "ევერტონსა" და "არსენალში" გაატარა. 2016-2019 წლებში არტეტა "მანჩესტერ სიტიში" პეპ გვარდიოლას თანაშემწე იყო, 2019 წლის დეკემბრიდან კი "არსენალის" მთავარი მწვრთნელია.

ხერარდ მორენო სანდო წყაროა, თუმცა ვიქტორ ფონტთან ძალიან დაახლოებული. გამოითქვა მოსაზრება, რომ შესაძლოა, მან ეს ინფორმაცია ლაპორტას კანდიდატურისთვის ზიანის მისაყენებლად გაავრცელა, თუმცა ძნელი წარმოსადგენია, ავტორიტეტულმა ჟურნალისტმა საკუთარი პრესტიჟი შესწიროს კანდიდატს, რომელსაც არჩევნებში გამარჯვების მინიმალური შანსი აქვს.