ატლეტიკომ წააგო, ყველაფერი ბარსას ხელშია

რამდენიმე წუთის წინ "სევილიასა" და "ატლეტიკოს" შეხვედრა დასრულდა, რომელიც ანდალუსიურმა გუნდმა 1-0 მოიგო. ეს კი იმას ნიშნავს, რომ "ბარსელონას" საჩემპიონო შანსები კიდევ უფრო გაიზარდა.

უკვე დიდი ხანია, "ატლეტიკო" ქულებს სტაბილურად კარგავს. შედეგად კი მივიღეთ რეალობა, რომ "ბარსელონა" მადრიდულ გუნდს მხოლოდ 4 ქულით ჩამორჩება, მაგრამ ერთი თამაში რეზერვში აქვს. თუ "ბარსამ" ხვალ "ვალიადოლიდი" დაამარცხა, და ეს დიდი ალბათობით ასეც მოხდება, "ბლაუგრანა" "როხიბლანკოსთან" ჩამორჩენას 1 ქულამდე შეამცირებს, ამ გუნდებს კი "კამპ ნოუზე" აქვთ სათამაშო.

დღევანდელი სიტუაციის გათვალისწინებით, ყველაფერი "ბარსელონას" ხელშია - თუ კატალონიური გუნდი ყველა დარჩენილ თამაშს მოიგებს, ჩემპიონი აუცილებლად გახდება. რა თქმა უნდა, ათივე თამაშის მოგება ძალიან ძნელი იქნება, მაგრამ იმის ცოდნა, რომ ყველაფერი შენ ხელშია, ფსიქოლოგიურად ძალიან ბევრს ნიშნავს.