ფრენკი დე იონგი "ელ კლასიკოს" წინ

"კლასიკოს" წინ წნეხი ყოველთვის გაზრდილია. არ ვფიქრობ, რომ ხვალინდელი მატჩი გადამწყვეტია, თუმცა მოგებას ჩვენთვის მაინც განსაკუთრებული მნიშვნელობა აქვს. თუ სამ ქულას ავიღებთ, საბოლოო მიზანთან ძალიან ახლოს მივალთ. 
ჩვენზეა დამოკიდებული, მოვიგებთ თუ არა ლა ლიგას. თუ ყველა დარჩენილ შეხვედრაში გავიმარჯვებთ, პირველ ადგილს დავიკავებთ. თასის ფინალიც ძალიან მნიშვნელოვანია, მაგრამ ახლა ამაზე არ ვფიქრობთ და მთლიანად "რეალთან" მატჩზე ვართ კონცენტრირებულები. 

"ბარსელონაში" თამაში ჩემი ბავშვობის ოცნება იყო. ყოველთვის მინდოდა აქ მოვხვედრილიყავი, ახლა კი იმაზე ვზრუნავ, რომ კლუბში რაც შეიძლება დიდხანს დავრჩე. 
"ბარსას" ლეგენდარულ ფეხბურთელებთან საკუთარი თავის შედარება მიჭირს. მინდა, საკუთარი ისტორია თავად დავწერო.
ჩემი ფავორიტი ფეხბურთელი? არ ვიცი. ალბათ მესი. როცა მე 12 წლის ვიყავი, ის უკვე საუკეთესო იყო. 

ყოველთვის იმ პოზიციაზე ვითამაშებ, სადაც მწვრთნელი საჭიროდ ჩათვლის. ხშირად ვამბობ, რომ თავს ყველაზე კომფორტულად მოედნის ცენტრში ვგრძნობ, მაგრამ პრობლემა არ მაქვს, თუ გუნდის დახმარება სხვა პოზიციაზე ყოფნით მომიწევს. 
პოზიცია ჩემი ვარჯიშის რუტინას არ ცვლის, ასე რომ, ამას ჩემზე დიდი გავლენა არ ექნება, მაგრამ მაინც არ ვფიქრობ, რომ ცენტრალურ დაცვაში კიდევ ბევრჯერ ვითამაშებ. 

პრე-სეზონი არ გვქონდა. სეზონის დასაწყისში ჯერ კიდევ ახალ სისტემასა და ახალ თანაგუნდელებს ვეჩვეოდით, ახლა კი კარგად შევთამაშდით. გუნდს თავდაჯერება მოემატა. 
ახალგაზრდა ფეხბურთელებს "ბარსელონას" დნმ აქვთ. ისინი სწრაფად პროგრესირებენ, რაც კლუბისთვის ძალიან მნიშვნელოვანია. 

ცუდია, რომ ჩემპიონთა ლიგას გამოვეთიშეთ, მაგრამ ამ სეზონში ლა ლიგისა და კოპა დელ რეის მოგებას მაინც ვაპირებთ, ჰოლანდიის ნაკრებთან ერთად კი ევროპის ჩემპიონატის მოსაგებად ვიბრძოლებ.