ლაპორტას არჩევანი - ვინ იქნება "ბარსელონას" მწვრთნელი?

"ბარსელონას" გარშემო ახლა ერთი მთავარი კითხვაა - ვინ გაწვრთნის გუნდს მომდევნო სეზონში? ჟოან ლაპორტასა და კლუბის ამჟამინდელ მწვრთნელს, რონალდ კუმანს შორის შეხვედრა გაიმართა, თუმცა ჰოლანდიელის ბედი ჯერაც გაურკვეველია. ამ ფონზე "ბლაუგრანას" პრეზიდენტს არჩევანი აქვს გასაკეთებელი, ან დატოვოს კუმანი, ან მისი შემცვლელი მოიყვანოს. კლუბის მწვრთნელის ვაკანტური ადგილის დასაკავებლად კი რამდენიმე კანდიდატურა განიხილება.

ჩავი ერნანდესი

ერნანდესი, მისი წასვლის დღიდან, ყოველთვის გუნდის მწვრთნელობის ერთ-ერთ კანდიდატურად მოიაზრებოდა, ლაპორტას მოსვლამ კი ამის შანსები გაზარდა. Marca-ს ცნობით, ლაპორტა ბოლომდე დარწმუნებული არ არის, რამდენად შესაფერისი დროა ჩავის დასაბრუნებლად. ამასთანავე, ესპანელმა კონტრაქტი გაახანგრძლივა "ალ სადთან" და კარიერას ყატარში გააგრძელებს.

მიკელ არტეტა

ესპანელი სპეციალისტი ის ვარიანტია, რომლითაც ლაპორტა ყოველთვის მოხიბლული იყო. საარჩევნო კამპანიისას "ბარსელონას" პრეზიდენტს არტეტასთანაც ჰქონდა კავშირი. მართალია იგი ლონდონში თავს კარგად გრძნობს, თუმცა კატალონიურ კლუბში გადმოსვლაც არ გამოირიცხება. ამასთან, არტეტა "ბარსელონას" სტილის მწვრთნელია, წლები მუშაობდა პეპ გვარდიოლას გუნდში და "ლა მასიაშიც" კი ვარჯიშობდა, როგორც მოთამაშე.

ერიკ ტენ ჰაგი

ტენ ჰაგი ერთ-ერთ შესაფერის ვარიანტად განიხილება, რადგან "აიაქსისა" და "ბარსელონას" საფეხბურთო ფილოსოფია მსგავსია. სწორედ ჰოლანდიელმა სპეციალისტმა ჩამოაყალიბა ახალი ფორმაციის "აიაქსი" და კონკურენტუნარიან კლუბად აქცია. "ბლაუგრანასთვის" სამწუხაროდ, ტენ ჰაგმა "აიაქსთან" კონტრაქტი გაახანგრძლივა, რაც მისი მოსვლის შანსებს ამცირებს.

ფრენკ რაიკაარდი

Mundo deportivo ფრენკ რაიკაარდს ერთ-ერთ ვარიანტად განიხილავდა. სწორედ მან მოაგებინა "ბარსელონას" მეორე ევროპული თასი. თუმცა ჰოლანდიელს 2013 წლის შემდეგ არცერთი გუნდი არ გაუწვრთნია.

იურგენ კლოპი

ლაპორტას იურგენ კლოპისადმი დიდი სიმპათიები აქვს. მით უმეტეს იმის ფონზე, რაც გერმანელმა "სპეციალისტმა" ლივერპულში გააკეთა. თუმცა კლოპი "ბარსელონას" სტილის მწვრთნელი არაა, ამათან მას მერსესაიდულ კლუბთან კონტრაქტიც აკავშირებს.

ანტონიო კონტე

ლაპორტას ალტერნატივათა სიას კი ანტონიო კონტე შეემატა. იტალიელმა სპეციალისტმა "ინტერი" მას შემდეგ დატოვა, რაც იტალიურ კლუბს 11-წლიანი პაუზის შემდეგ სერია A მოაგებინა. 

ლაპორტას ოცნება - პეპ გვარდიოლა

რომ შეეძლოს, ჟოან ლაპორტა დიდი სიამოვნებით დააბრუნებდა პეპ გვარდიოლას მშობლიურ კედლებში, თუმცა ესპანელი ახლა მთლიანად "მანჩესტერ სიტიზეა" გადართული და კარიერაში მესამე ჩემპიონთა ლიგის მოგებას ეცდება.