როგორ გაუშვა რონალდ კუმანმა ერლინგ ჰოლანდის 4 მილიონად შეძენის შანსი ხელიდან

მსოფლიოს ერთ-ერთი ყველაზე მოთხოვნადი ფეხბურთელი, ერლინგ ჰოლანდი, არც ისე დიდი ხნის წინ "ბარსელონას" (და არა მარტო) მთავარი სამიზნე იყო, თუმცა ფინანსური მდგომარეობის გამო ტრანსფერის განხორციელება ვერ მოხერხდა.

საინტერესოა, რომ კატალონიური გუნდის მთავარ მწვრთნელს, რონალდ კუმანს, რამდენიმე წლის წინ ჰქონდა შანსი, ჰოლანდი თავის გუნდში 4 მილიონ ევროდ დაემატებინა, მაგრამ უარი თქვა - წერს The Athletic. 

"ევერტონში" მუშაობის დროს კუმანისთვის სკაუტის როლს სტივ უოლში ასრულებდა. ეს ის ადამიანია, რომელმაც "ლესტერ სიტიში" ნ'გოლო კანტე, რიად მაჰრეზი და ჯეიმი ვარდი მიიყვანა. 

უოლშმა 16 წლის ჰოლანდი შეამჩნია, რომელიც ჯერ კიდევ ნორვეგიის ჩემპიონატის მეორე დივიზიონში თამაშობდა. ერლინგმა და მისმა მამამ, პრემიერ ლიგის ყოფილმა ფეხბურთელმა, ალფ-ინგე ჰოლანდმა, "ევერტონში" გადასვლაზე თანხმობა განაცხადეს, მაგრამ კუმანი თანხის გადახდას არ დათანხმდა. 

მოგვიანებით ჰოლანდი "ზალცბურგს" შეუერთდა, საიდანაც 20 მილიონ ევროდ "დორტმუნდში" გადავიდა, ახლა კი მისი ფასი 150 მილიონია. 

მიმდინარე სატრანსფერო ფანჯარაზე "ბარსელონასთვის" ნორვეგიელის შეძენა არარეალურია, ამიტომ კლუბმა აქცენტი სხვა ფორვარდებზე გააკეთა. კატალონიელებმა "მანჩესტერ სიტიდან" სერხიო აგუერო დაიმატეს და ახლა მემფის დეპაის გაფორმებას ცდილობენ.