ლეო მესისა და სერხიო აგუეროს არგენტინამ ჩილე ვერ დაამარცხა

ცოტა ხნის წინ დასრულდა 2021 წლის კოპა ამერიკაზე ლიონელ მესისა და სერხიო აგუეროს არგენტინის პირველი შეხვედრა, რომელშიც იგი ჩილეს ნაკრებს დაუპირისპირდა.

მატჩის პირველ ნახევარში უპირატესობა ხელთ "ალბისელესტემ" იგდო და მეტოქის კართან რამდენიმე საგოლე შანსი შექმნა. 33-ზე წუთზე კი ლეო მესიმ საჯარიმო დარტყმიდან "ბარსას" ყოფილ მეკარეს, კლაუდიო ბრავოს ბრწყინვალე გოლი გაუტანა და თავისი გუნდი დააწინაურა. ასევე, კარგი მომენტი ჰქონდა ლაუტარო მარტინესს, თუმცა "ინტერის" შემტევმა მისი გამოყენება ვერ მოახერხა. საბოლოო ჯამში, ლიონელ სკალონის შეგირდებმა პირველ 45 წუთში 3 ზუსტი დარტყმა განახორციელეს და შესვენებაზე მინიმალური სხვაობით გავიდნენ.

მეორე ტაიმი ჩილელებმა აქტიურად დაიწყეს. 53-ე წუთზე მეკარესთან პირისპირ დარჩენილმა ედუარდო ვარგასმა ემილიანო მარტინესს ვერ გაუტანა, თუმცა გადმოვარდნილ ბურთზე ბრძოლისას, ნიკოლას ტალიაფიკოს მიერ მესის კიდევ ერთი ყოფილი თანაგუნდელის, არტურო ვიდალის წინააღმდეგ თამაშის წესების დარღვევის გამო, ვილმარ როლდანმა არგენტინელთა კარში პენალტი დანიშნა. თერთმეტმეტრიანი თავად დაზარალებულმა, "მეფე არტურომ" შეასრულა, რომლის დარტყმაც ემილიანომ მოიგერია, თუმცა დამატებაზე ვარგასმა კარგად ითამაშა და ასხლეტილი ბურთი კარში მოათავსა. გაშვებული გოლის შემდეგ "ლა პულგამ" ორი მომენტი შექმნა, მაგრამ პირველ შემთხვევაში მისი დარტყმა გარი მედელმა დაბლოკა, მეორედ კი ლეოს ბრავომ აჯობა. მე-80 წუთზე, მესის პასის წყალობით, გატანა შეეძლო ნიკოლას გონსალესსაც, თუმცა ამ უკანასკნელის თავური მიზანს ასცდა. საბოლოოდ, გუნდები ერთმანეთს დაუზავდნენ - 1-1.

"ბარსელონას" ახალწვეული, სერხიო აგუერო მოედანზე 81-ე წუთზე გამოჩნდა, მაგრამ ბევრი ვერაფერი მოასწრო.

არგენტინელები შემდეგ ტურში, 19 მაისს, თბილისის დროით 04:00 საათზე, ურუგვაის დაუპირისპირდებიან.