MD | ალეგრის გამო პიანიჩის "იუვეში" დაბრუნება უფრო რეალურია

"ბარსელონადან" წამსვლელთა რიგებში კიდევ ერთი ფეხბურთელის სახელი ძალიან აქტიურად ფიგურირებს. ეს ფეხბურთელი მირალემ პიანიჩია, რომლის მომავალ კლუბად კვლავინდებურად "იუვენტუსი" სახელდება.

არტური-პიანიჩის გაცვლით ვერცერთმა გუნდმა იხეირა. თუმცა, უცხო კლუბთან შეჩვევა უფრო რთული სწორედ მირალემისთვის იყო. რონალდ კუმანი მას ძალიან იშვიათად ენდობოდა და სერხიო ბუსკეტსის შემცვლელად თამაში მისთვის ძალიან წარუმატებელი გამოდგა. მასიმილიანო ალეგრის "ბებერი ქალბატონის" თავკაცად დაბრუნება ბოსნიელი ფეხბურთელის ძველ კლუბში დასაბრუნებლად კიდევ ერთი ბიძგისმიმცემი აღმოჩნდა.

MD-ის ცნობით, მიუხედავად იმისა, რომ პიანიჩს "იუვეში" გადაბარგება სურს, ის სხვა გუნდების ალტერნატივასაც არ გამორიცხავს. ამის მიზეზი კი პირველ რიგში, "ბიანკონერის" ლოკატელის მიმართ ინტერესია, მანუელი კი სწორედ პიანიჩის პოზიციაზე თამაშობს.

გასულ სეზონში ფეხბურთელმა მონაწილეობა 30 შეხვედრაში მიიღო და თავი ვერც გოლით და ვერც ასისტით გამოიჩინა. მისმა ღირებულებამ 2020 წელთან შედაფრებით გამოკვეთილად, 25 მილიონით იკლო და ამ მომენტისთვის ის მხოლოდ 20 მილიონ ევროდაა შეფასებული.