ატლეტიკო საულის გაშვებას ჩქარობს

მადრიდის "ატლეტიკო" ცდილობს, გუნდიდან საულ ნიგესის წასვლის საკითხი რაც შეიძლება მალე მოაგვაროს. ამ ინფორმაციას Mundo Deportivo ავრცელებს.

ბოლო დროს საულს "ბარსელონას" აქტიურად უკავშირებენ. ვრცელდება ცნობები, რომელთა თანახმადაც, "ბარსა" და "ატლეტიკო" ანტუან გრიზმანისა და საულის გაცვლაზე მუშაობენ.

MD-ს ცნობით, "როხიბლანკოს" 26 წლის ნახევარმცველის მომავლის სწრაფად გადაწყვეტა უნდა. ბარტერზე ორივე კლუბის მწვრთნელები თანახმანი არიან, თუმცა "ბლაუგრანას" გარკვეული ეჭვები აქვს. კატალონიური კლუბი შიშობს, რომ ლუის სუარესის შეცდომას გაიმეორებს.

იმავე წყაროს ცნობით, ესპანელი ფეხბურთელის შეძენა სურს "ლივერპულსაც", რომელიც საულს ჯორჯინიო ვეინალდუმის შემცვლელად განიხილავს.