Sport: რაფაელ ბენიტესს კლემან ლანგლეს გადაბირება სურს

"ბარსელონას" ფრანგი ფეხბურთელი, შესაძლოა, კლემან ლანგლე, მომდევნო სეზონიდან "ევერტონის" რიგებში ვიხილოთ.

Sport-ის მტკიცებით, მერსისაიდელთა ახალ მთავარ მწვრთნელს, რაფა ბენიტესს, ლანგლეს გადაბირება სურს. ესპანელი სპეციალისტი მიიჩნევს, რომ იერი მინა, რომელიც "ევერტონს" სწორედ "ბარსადან" შეუერთდა, მის სათამაშო სქემას ვერ მოერგება, მის შემცვლელად კი ლანგლეს მოიაზრებს. მან "ევერტონის" ხელმძღვანელობას 26 წლის მცველის შეძენის თხოვნით უკვე მიმართა.

გადადგომამდე, ჟოზეპ მარია ბართომეუმ ლანგლეს ხელშეკრულება 2026 წლამდე გაუხანგრძლივა. სათანადო შემოთავაზების არსებობის შემთხვევაში, კუმანი და ლაპორტა მის გაშვებას დათანხმდებიან. გუნდისთვის, ლანგლეს გაშვება კარგი იქნება როგორც სპორტული, ასევე ფინანსური კუთხით - "ბარსელონა", მესისთან ახალი კონტრაქტის დასადებად, სახელფასო ბიუჯეტის შემცირებას ცდილობს.

"ბლაუგრანამ" ლანგლე 2018 წელს, "სევილიადან", 36 მილიონი ევროს სანაცვლოდ, შეიძინა. მას შემდეგ, ფრანგმა "ბარსას" მაისურით 133 შეხვედრა ჩაატარა. ამჟამად, Transfermarkt მას 25 მილიონ ევროდ აფასებს.