შეთანხმება ვერ შედგა; კოლიადო ისევ ბარსელონაში ვარჯიშობს
"ბარსა ბ-ს" ყოფილი კაპიტანი, ალექს კოლიადო, სარეზერვო გუნდში თამაშს აღარ აპირებს. კლუბის ოფიციალური ინფორმაციით, 22 წლის ფეხბურთელი სათამაშო პრაქტიკის მისაღებად ერთი წლის სხვა კლუბში გატარებას გეგმავს, რის შემდეგაც "ბარსელონას" პირველი გუნდის შემადგენლობაში თავის დამკვიდრებისთვის იბრძოლებს.
მოლაპარაკებები ბელგიურ "ბრიუგესთან" მიმდინარეობდა, თუმცა Sport-ის ჟურნალისტის, ალბერ როგეს ცნობით, შეთანხმება ვეღარ შედგება. ბელგიელებს გამოსყიდვის უფლების მიღება სურთ, "ბარსას" კი, ისევე როგორც თავად კოლიადოს, კონტრაქტში ასეთი პუნქტის შეტანა არ უნდა.
"ბრიუგეს" ვარიანტი მისაღები იმის გამო იყო, რომ კლუბი ამ სეზონში ჩემპიონთა ლიგის ჯგუფურ ეტაპზე იასპარეზებს, რაც კოლიადოს გამოცდილების მიღებაში დაეხმარებოდა.
ასე რომ, თუ შეთანხმება სხვა სასურველ კლუბთან ვერ მოხერხდა, შესაძლოა, კოლიადო წელს რონალდ კუმანის გუნდში ვიხილოთ.
დღეს ახალგაზრდა შემტევმა გუნდთან ერთად ივარჯიშა. დიდი ალბათობით, ის გამპერის თასზე "იუვენტუსთან" შეხვედრაში მონაწილეობას მიიღებს.
ამ სიახლეზე კომენტარები გათიშულია.
კომენტარები [ 8 ]