Golden Boy-ს 40-კაციანი სია ცნობილია - პედრი მთავარი ფავორიტია

Tuttosport-მა Golden Boy-ს განახლებული, 40-კაციანი სია წარმოადგინა, რომელშიც "ბარსელონადან" პედრი და ერიკ გარსია მოხვდნენ. თავად იტალიური გამოცემა "ბლაუგრანას" 18 წლის ნახევარმცველს მთავარ ფავორიტად მიიჩნევს - "ნადირობა პედრიზე" - ასეთი სათაური გაუკეთა TS-მ გამოქვეყნებულ სიას. 

გასული სეზონი პედრისთვის მარათონული გამოდგა - გონსალესმა 73 შეხვედრაში მიიღო მონაწილეობა. "ბარსელონაში" ჩატარებული შესანიშნავი სადებიუტო სეზონის გარდა, მან ევროპის ჩემპიონატსა და ოლიმპიადაზეც გაიბრწყინა. ევრო 2020-ზე პედრი საუკეთესო ახალგაზრდა ფეხბურთელად დაასახელეს, ტოკიოს ოლიმპიურ თამაშებზე კი ესპანეთის ნაკრებთან ერთად ვერცხლის მედალი მოიპოვა.

Golden Boy Tuttosport-ის მიერ 2003 წელს დაარსებული პრიზია, რომელიც საუკეთესო ახალგაზრდა, 21 წლამდე ასაკის, ფეხბურთელს გადაეცემა. მისი უკანასკნელი გამარჯვებული ერლინგ ჰოლანდია.

პედრისთვის (ან გარსიასთვის) ხმის მიცემა ამ გვერდზე შეგიძლიათ.