სერხიო ბუსკეტსი უნიკალური მიღწევის ზღვარზე

ესპანეთის ნაკრებთან ერთად დღეს გამარჯვების მოპოვების შემთხვევაში, სერხიო ბუსკეტსის კარიერას უნიკალური მიღწევა შეემატება. "ბარსელონას" ნახევარმცველს შანსი აქვს, გახდეს პირველი ფეხბურთელი, რომელსაც მოგებული ექნება როგორც მსოფლიო ჩემპიონატი, ასევე ევროპის ჩემპიონატი და UEFA-ს ერთა ლიგა.

"ფურია როხა" ერთა ლიგის წლევანდელი გათამაშების ფინალში საფრანგეთს "სან სიროზე" ამ საღამოს დაუპირისპირდება. მატჩის დაწყება თბილისის დროით 22:45 საათისთვისაა დაგეგმილი. 

ბუსკეტსმა სანაკრებო კარიერა 2009 წელს დაიწყო. მან 2010 წელს მსოფლიო თასი მოიგო, 2 წლის შემდეგ კი ევროპის ჩემპიონატი. 

როგორც იცით, აქამდე ერთა ლიგა მხოლოდ ერთხელ ჩატარდა, გამარჯვებული გუნდიდან კი მსგავსი მიღწევა არავის ჰქონია - პორტუგალიის ნაკრებმა ოქროს მედლებით ევრო 2016 დაასრულა, თუმცა მუნდიალი არასდროს მოუგია. ესპანელთა დღევანდელმა მეტოქემ საფრანგეთის ნაკრებმა კი, რომელიც მსოფლიოს მოქმედი ჩემპიონია, ევროპის ჩემპიონატი ბოლოს 2000 წელს მოიგო და რა თქმა უნდა, იმ შემადგენლობიდან დღეს გუნდში აღარავინ ირიცხება.