MD: ბარსელონა ბოკა ხუნიორსთან თამაშით 3 მილიონ ევროს გამოიმუშავებს

14 დეკემბერს, საუდის არაბეთში "ბარსელონა" და "ბოკა ხუნიორსი" ამხანაგურ შეხვედრას გამართავენ.

მატჩი, რომელსაც ქალაქი რიადი უმასპინძლებს, მარადონას თასის სახელწოდებას ატარებს. Mundo Deportivo იუწყება, რომ ამ მატჩში მონაწილეობით კატალონიური კლუბი, თითქმის, 3 მილიონ ევროს მიიღებს, საიდანაც 1 მილიონი ფეხბურთელებზე გადანაწილდება.

ამ მატჩს ორგანიზებას კომპანია RG Consultant & Sport Solutions უწევს, რომელთანაც "ბარსას" ადრეც უთანამშრომლია. 2018 წელს, სამხრეთ აფრიკის ყოფილი პრეზიდენტის, ნელსონ მანდელას, დაბადებიდან 100 წლის იუბილის აღსანიშნავად, "ბარსა" იოჰანესბურგში გაემგზავრა და "მამელოდი სანდაუნსთან" ამხანაგური მატჩი გამართა.

თავდაპირველად, ორგანიზატორები მარადონას თასზე "ნაპოლის" იწვევდნენ, თუმცა იტალიური კლუბის პრეზიდენტმა, აურელიო დე ლაურენტისმა, 5 მილიონი ევროს გადახდა მოითხოვა და შედეგად, შეთანხმება ვერ შედგა.

აღსანიშნავია, რომ ამ მატჩში მონაწილეობის შემდეგ, ერთ თვეში, "ბარსა" საუდის არაბეთში დაბრუნდება და ესპანეთის სუპერ თასზე ითამაშებს. ნახევარფინალში კატალონიელები მადრიდის "რეალს" დაუპირისპირდებიან.