ბარსელონა აგუეროს კარიერის დასრულებას ამაღამ დაადასტურებს - El Chiringuito

დღეს კიდევ ერთხელ გავრცელდა ინფორმაცია, რომ სერხიო აგუერომ გულის პრობლემების გამო კარიერის დასრულება გადაწყვიტა. ამჯერად ცუდი ისაა, რომ ამ ინფორმაციას მხოლოდ ერთი წყარო არ ავრცელებს.

Marca-ს შემდეგ ინფორმაცია El Chiringuito-ს ჟურნალისტმა, ხოსე ალვარესმაც დაადასტურა. მისი ცნობით ოთხშაბათს, ადგილობრივი დროით 12 საათზე (თბილისის დროით 15 საათზე) სერხიო აგუერო პრესკონფერენციას გამართავს. თუმცა ინფორმაცია ოფიციალურად მანამდე დადასტურდება. მოსალოდნელია, რომ "ბარსელონა" ამას ამაღამ განცხადებით დაადასტურებს.

33 წლის სერხიო აგუერო "ბარსელონას" გასულ ზაფხულში თავისუფალი აგენტის სტატუსით შეუერთდა. მან კატალონიური გუნდის მაისურით 5 თამაშის ჩატარება და ერთი გოლის გატანა მოასწრო. 30 ოქტომბერს "ალავესთან" გამართული შეხვედრის პირველ ტაიმში არგენტინელმა გულ-მკერდის არეში ტკივილი იგრძნო. მალევე გაირკვა, რომ არგენტინელს გულთან დაკავშირებით პრობლემები აქვს.