5 მიზეზი, თუ რატომ გადაწყვიტა დემბელემ ბარსელონაში დარჩენა

გუშინ გავრცელდა ინფორმაცია, რომ უსმან დემბელემ "ბარსელონაში" დარჩენა გადაწყვიტა. ფრანგი ფეხბურთელი კატალონიელებთან ახალ ხელშეკრულებას, სავარაუდოდ, მომდევნო კვირაში გააფორმებს.

კატალონიური Sport გვთავაზობს იმ 5 მიზეზს, რომელთა გამოც დემბელემ "ბლაუგრანაში" დარჩენა გადაწყვიტა.

ჩავის პროექტი

ჩავიმ პირველივე პრესკონფერენციაზე განაცხადა: "დემბელეს შეუძლია, თავის პოზიციაზე მსოფლიოში საუკეთესო გახდეს". უსმანი ამ განცხადებით კმაყოფილი დარჩა. ის ასევე კმაყოფილია იმით, თუ როგორ ეპყრობიან მას ვარჯიშებისა და თამაშების დროს. ჩავიმ მას თავდაჯერება შემატა. დემბელემ იცის, რომ ის "ბარსელონაში" მნიშვნელოვანი ფეხბურთელია და ასე იქნება უახლოეს წლებში.

იდეალური სისტემა

ჩავი 3-4-3 ან 4-3-3 სისტემით თამაშობს, დემბელე კი ორივე ამ სისტემას იდეალურად ერგება. ფრანგი ორივე შემთხვევაში თავს ძალიან კომფორტულად გრძნობს. დემბელემ ასევე იცის, რომ ჩავის დავალებით მას თანაგუნდელები დაცვაში ზურგს უმაგრებენ, რის გამოც ის მეტოქის მოტყუებაზე თამამად მიდის.

სტაბილური პროექტი

ჩავის "ბარსელონასთან" კონტრაქტი 2024 წლამდე აკავშირებს. დემბელემ იცის, რომ ხელმძღვანელობა ჩავის ენდობა და მას იდეების განხორციელებისთვის საკმარის დროს მისცემს. ფრანგი ესპანელის სათამაშო ფილოსოფიას ეთანხმება. მან იცის, რომ "ბარსელონაში" იმ ფეხბურთს ითამაშებენ, რომელიც მას მოსწონს.

მსოფლიოს 2022 წლის ჩემპიონატი

დემბელე მსოფლიოს მოქმედი ჩემპიონია და ის საფრანგეთის ნაკრების წევრი ახლაცაა, მაგრამ ეროვნულ გუნდში შეუცვლელი ფეხბურთელი ნამდვილად არ ეთქმის. არაა გამორიცხული, სხვა გუნდში გადასვლამ და ადაპტაციის შესაძლო პრობლემებმა უსმანს ნაკრებში ადგილი დააკარგვინოს და ეს მას მსოფლიო ჩემპიონატის გამოტოვებად დაუჯდეს. "ბარსაში" დარჩენის შემთხვევაში კი მას კატარში გამგზავრების მეტი შანსი აქვს.

ბონუსები

დარჩებოდა თუ წავიდოდა, დემბელეს ხელფასის შემცირება მოუწევდა, რადგან ახლა მას ზედმეტად მაღალი ანაზღაურება აქვს. სხვა კლუბები უფრო მეტს სთავაზობდნენ, ვიდრე ახალ კონტრაქტში იქნება გათვალისწინებული, სამაგიეროდ "ბარსელონას" შეთავაზება მოიცავს ბონუსებს, რომლებიც დამოკიდებულია ბევრ ფაქტორზე, მაგალითად ჩატარებული თამაშების რაოდენობასა და მოგებულ ტიტულებზე. ამ ბონუსების წყალობით დემბელეს ისევ ბევრის გამომუშავება შეუძლია, მაგრამ ამისთვის მაღალ დონეზე თამაში იქნება საჭირო.