სპორტინგი ტრინკაუს შეძენით ინტერესდება

"ბარსელონას" საკუთრებაში მყოფმა ფრანსიშკუ ტრინკაუმ, რომელიც იჯარით "ვულვერჰემპტონში" თამაშობს, შესაძლოა, ზაფხულში კლუბი შეიცვალოს.

პორტუგალიური გამოცემის O Jogo-ს ინფორმაციით, 22 წლის ფეხბურთელით ლისაბონის "სპორტინგი" დაინტერესდა. "ლომებს" ტრინკაუს იჯარით დამატება სურთ.

წყაროს თანახმად, "სპორტინგში" თამაში თავად ფრანსიშკუსაც სურს. ფეხბურთელის მიზანი ჩემპიონთა ლიგაზე ასპარეზობაა, რისთვისაც ლისაბონური გრანდი მშვენიერი ადგილია.

"ბარსელონამ" ტრინკაუ 2020 წელს "ბრაგადან" დაიმატა, თუმცა ფეხბურთელმა "ბლაუგრანაში" ფეხი ვერ მოიკიდა და კლუბმა ის გასულ ზაფხულში "ვულვზში" გაანათხოვრა. 

ცნობისთვის, განიხილება ადამა ტრაორესა და ტრინკაუს გაცვლის ვარიანტიც.