როდის წააგო ბოლოს ბარსამ კამპ ნოუზე ზედიზედ 2 თამაში?

გასულ 4 დღეში "ბარსელონამ" "კამპ ნოუზე" ორი თამაში ჩაატარა. ორივეს მოგებას ველოდით, მაგრამ ორივე დავთმეთ. პირველ შემთხვევაში წაგებას ტიტულის მოგების რეალური შანსი გავაყოლეთ, გუშინ კი ტიტულის არარეალური შანსიც კი გამოგვეცალა ხელიდან.

როდის ჰქონდა "ბარსას" ბოლოს ასეთი შედეგი? როდის წააგო კატალონიურმა გუნდმა "კამპ ნოუზე" ზედიზედ 2 თამაში?

ასეთი რამ არც რონალდ კუმანის, არც კიკე სეტიენის, არც ერნესტო ვალვერდეს, არც ლუის ენრიკეს, არც ტატა მარტინოს, არც ტიტო ვილანოვას, არც პეპ გვარდიოლას და არც ფრანკ რაიკარდის დროს არ მომხდარა. "კამპ ნოუმ" ზედიზედ 2 მარცხი 2002/2003 წლების სეზონში იხილა. 2003 წლის 12 და 22 აპრილს "ბარსამ" ლა ლიგაში "დეპორტივოსთან" 2-4, ხოლო ჩემპიონთა ლიგაზე "იუვენტუსთან" 1-2 წააგო.

"იუვესთან" დამატებით ტაიმებში წავაგეთ, ძირითად დროში ზედიზედ 2 საშინაო წაგების მოსაძებნად კი მიმდინარე საუკუნეს უნდა გავცდეთ და აღმოვაჩენთ, რომ ასეთი რამ ბოლოს 1999 წლის თებერვალში მოხდა, როდესაც "ვალენსიასთან" ჯერ თასზე 2-3, შემდეგ კი ლა ლიგაში 2-4 წავაგეთ.

რამდენად დიდი მიღწევაა, როდესაც 19 წელია, საკუთარ კედლებში ზედიზედ 2 თამაში არ გქონდა წაგებული? მაგალითად ევროპული ფეხბურთის სხვა გრანდები მოვიყვანოთ:

• "რეალმა" ზედიზედ 2 საშინაო თამაში 2020 წელს წააგო, 2019 წელს კი ზედიზედ 4 წაგება ჰქონდა (აქედან 2 "ბარსასთნ").
• "მანჩესტერ იუნაიტედს" მხოლოდ 2021 წელს 3 შემთხვევა ჰქონდა, როდესაც საკუთარ კედლებში ზედიზედ 2-ჯერ წააგო;
• "ლივერპულს" 2021 წელს ზედიზედ 6 საშინაო მარცხი ჰქონდა;
• "ინტერმა" "სან სიროზე" ზედიზედ 2 შეხვედრა ერთი თვის წინ წააგო, მანამდე კი ასეთი შემთხვევა 2019, 2018, 2017 და 2016 წლებში ჰქონდა;
• "მილანს" 2021 წელს ასეთი რამ 2-ჯერ დაემართა;
• "ჩელსი" "სტემფორდ ბრიჯზე" ზედიზედ 2-ჯერ მიმდინარე თვეში დამარცხდა, მანამდე კი 2021 წელს და 2019 წელს ორჯერ;
• ამ მხრივ საქმე ყველაზე კარგად "ბაიერნსა" და "იუვენტუსს" აქვთ, რომლებიც საკუთარ კედლებში ზედიზედ 2 თამაში 2011 წლის შემდეგ არ წაუგიათ.