შესაძლოა, ბარსელონამ კუნდეს ტრანსფერში ფეხბურთელებიც ჩართოს

"ბარსელონას" ერთ-ერთი სატრანსფერო სამიზნე "სევილიას" ცენტრალური მცველი, ჟიულ კუნდეა. სპორტული სექტორი და ჩავი ერნანდესი ფრანგს ძალიან აფასებენ და რონალდ არაუხოს კარგ მეწყვილედ მიიჩნევენ.

ანდალუსიური კლუბი 23 წლის ფეხბურთელის გაშვებას არ ეწინააღმდეგება, თუმცა პრობლემა გამოსასყიდი თანხა - 80 მილიონი ევროა, რომლის გადახდაც "ბლაუგრანას" არ შეუძლია. ამის გამო, შესაძლოა, პოტენციურ ტრანსფერში მოთამაშეებიც ჩაერთონ.

Mundo Deportivo-ს ინფორმაციით, "სევილია" ფეხბურთელების გაცვლის წინააღმდეგი არაა. "ბარსას" ტრანსფერში სერჟინიო დესტისა და კლემან ლანგლეს ჩართვა სურს. ანდალუსიელები ამერიკელი უკანახაზელის ჩართვას მიესალმებიან, თუმცა ლანგლეს დაბრუნებაზე უარს აცხადებენ. 

ნებისმიერ შემთხვევაში, "ბარსელონა" ფინანსური სიტუაციის გამოსწორებასა და "სევილიას" პასუხს უნდა დაელოდოს. გასათვალისწინებელია, რომ კუნდეს შეძენა "ნიუკასლსა" და "ჩელსისაც" სურთ.