ოსკარ მინგესას 2 მსურველი ჰყავს

"ბარსელონას" მცველის, ოსკარ მინგესას კატალონიური კლუბიდან წასვლა გადაწყვეტილია. ცნობილია, რომ 23 წლის ესპანელს კლუბის გადაწყვეტილება ჩავიმ გააცნო და მინგესა ამ გადაწყვეტილებას დაეთანხმა.

Mundo Deportivo-ს მიერ ცოტა ხნის წინ გავრცელებული ინფორმაციის თანახმად ამ ეტაპზე მინგესას ორი მსურველი ჰყავს. საუბარი ესპანურ "ვალენსიასა" და გერმანულ "ჰოფენჰაიმზეა". ეს კლუბები "ბარსელონას" უკვე დაუკავშირდნენ.

იგივე წყარო იტყობინება, რომ "ბლაუგრანას" მინგესაში მინიმუმ 5 მილიონი ევროს აღება სურს.

ოსკარ მინგესა "ბარსელონას" სკოლის აღზრდილია. პირველ გუნდში ის 2020 წელს გამოჩნდა და 66 თამაშის ჩატარება მოასწრო.