ნეტუ ბარსელონადან წასვლაზე უარს ამბობს, კლუბი კონტრაქტის გაწყვეტაზე ფიქრობს
"ბარსელონას" სპორტულ დეპარტამენტს ახალი პრობლემა გაუჩნდა. გუნდის სათადარიგო მეკარე ნეტუ "ბლაუგრანას" დატოვებას არ აპირებს.
32 წლის ბრაზილიელ მეკარეს არაერთი შეთავაზება ჰქონდა, მათ შორის იტალიიდან, სადაც მას უკვე უთამაშია და ასევე სამშობლოდან. ცნობილია, რომ რომის "ლაციო" მზად იყო, ნეტუ დაემატებინა, თუ "ბარსელონა" ფეხბურთელს უფასოდ გაუშვებდა. ასევე ვრცელდება ინფორმაცია, რომ კატალონიელები ამისთვის მზად იყვნენ, რადგან მათი მთავარი ამოცანა სახელფასო დანახარჯების შემცირებაა.
ახლა კი Sport იტყობინება, რომ ფეხბურთელმა "ბარსელონას" დატოვებაზე უარი განაცხადა. მას სურს, კონტრაქტით დარჩენილი ვადა, ერთი წელი კატალონიურ კლუბში გაატაროს და კუთვნილი ხელფასი მიიღოს. ამის მიზეზი სავარაუდოდ ისაა, რომ მას იგივე ანაზღაურებას სხვა კლუბები ვერ შესთავაზებენ.
ნეტუმ გადაწყვეტილება უკვე აცნობა როგორც "ბარსას", ასევე საკუთარ აგენტებს. Sport-ის ცნობით ორივე მხარე გაკვირვებული დარჩა.
კატალონიური მედიის ინფორმაციით "ბარსელონა" ფეხბურთელთან კონტრაქტის ცალმხრივად გაწყვეტაზე ფიქრობს.
ამ სიახლეზე კომენტარები გათიშულია.
კომენტარები [ 8 ]