ბარსელონა UEFA-სგან მინიმუმ 140 ათას ევროს მიიღებს

UEFA ქალების ფეხბურთის განვითარებაზე ზრუნვას განაგრძობს, რაც ამ მიმართულებით მეტი ფულის ხარჯვაში გამოიხატება.

ივლისში ინგლისში ქალების ევროპის ჩემპიონატი გაიმართება. UEFA-ს გადაწყვეტილებით ტურნირის საპრიზო ფონდი 16 მილიონი ევრო იქნება, რაც წინა გათამაშების საპრიზო ფონდს ზუსტად ორჯერ აღემატება.

გაზრდილია იმ კლუბების კომპენსაციაც, რომელთა ფეხბურთელებიც ევროპის ჩემპიონატზე ითამაშებენ. ერთი ფეხბურთელის მიერ ტურნირზე გატარებულ თითო დღეში კლუბი 500 ევროს მიიღებს. ეს ნიშნავს, რომ თითო ფეხბურთელი თავის კლუბს მინიმუმ 10 ათას ევროს მოუტანს. იმ შემთხვევაში, თუ მისი გუნდი ჯგუფიდან გავა, ფეხბურთელი კლუბის ბიუჯეტს კიდევ უფრო მეტით შეავსებს.

ჯერჯერობით ტურნირის საბოლოო განაცხადები ცნობილი არაა, მაგრამ ვიცით, რომ "ბარსელონას" ბევრი წარმომადგენელი ეყოლება. Sport ვარაუდობს, რომ "ბარსელონა" მინიმუმ 140 ათას ევროს მიიღებს და თუ "ბლაუგრანას" ფეხბურთელების გუნდები ჯგუფიდან გავლენ, რაც დიდი ალბათობით მოხდება კიდეც, ეს თანხა გაიზრდება.

იმის გათვალისწინებით, რომ "ბარსელონას" ქალების გუნდის ბიუჯეტი მხოლოდ 4.5 მილიონი ევროა, UEFA-სგან მიღებული თანხა კატალონიელებისთვის უმნიშვნელო ნამდვილად არ იქნება.